Sfidat e Kishës në SHBA në takimin e Papës Benedikti XVI me ipeshkvijtë amerikanë
(17.04.2008 RV)Dje, në orën 16. 45 me orën vendase, 22. 45 me atë evropiane,
në nunciaturën apostolike, Ati i Shenjtë u takua me përfaqësues të pesë fondacioneve
bamirëse katolike e pikërisht me Kalorësit e Kolombos, Mbrojtësit e arteve në muzejtë
e Vatikanit, Centesimos Annus pro Pontefice, Fondacionin Papnor dhe Fondacionin Françeskan
për Tokën Shenjte, që i drejtuan Atit të Shenjtë një pëshëndetje të përzemërt. Pas
këtij takimi, Papa u nis për në selinë e Konferencës së ipeshkvijve katolikë të SHBA,
për të vijuar veprimtaritë në Shenjtëroren Kombëtare të Zojës së Papërlyer, ku kremtoi
lutjet mbrëmësore dhe u takua me ipeshkvijtë e SHBA. Pikërisht aty, Ati i
Shenjtë foli për problemet e kishës e të shoqërisë me ipeshkvijtë e vendit. Benedikti
XVI vuri në dukje se bashkësia katolike amerikane, në të cilën shërbejnë ipeshkvijtë,
është njëra nga më të mëdhatë në botë, prandaj përgjegjësia që bie mbi veprimtarinë
e kishës nuk ka të bëjë vetëm me të ardhmen e popullit amerikan, por edhe me atë të
Kishës universale. Amerikanët janë të njohur për vitalitetin dhe bujarinë e tyre.
SHBA-të janë një vend ku strukturat kishtare të bamirësisë janë më efikase se në të
gjithë botën e ku shkollat e krishtera konsiderohen të nivelit absolut më të lartë.
Besimtarët janë krenarë për përkatësinë e tyre fetare e nuk hezitojnë të ndërthurin
në jetën publike arësyet morale të rrënjosura në fenë e krishterë. Por edhe këtu shekullarizimi
ka shtrirë rrënjë të forta dhe përcakton sjelljet e njerezve në shoqëri. Në këtë kuadër,
Papa shpjegoi se si duhet ta kryejë misionin e vet një ipeshkëv, duke e vënë gishtin
mbi plagët e shoqërisë: “A është vallë koherente ta shpallim fenë tonë në kishë
të dielave e pastaj, përgjatë javës, të promovojmë praktika afariste apo procedura
mjekësore kundër fesë? A është vallë koherente për katolikët që shkojnë në kishë të
injorojnë apo t’i shfrytëzojnë të varfërit e të braktisurit, të promovojnë sjellje
seksuale në kundërshtim me moralin katolik, apo të mbajnë qëndrime që kundërshtojnë
të drejtën për jetë të çdo njeriu, që nga zënia deri në vdekjen e natyrshme? I duhet
rezistuar çdo prirjeje për ta konsideruar fenë si diçka private. Vetëm kur feja ngjiz
çdo aspekt të jetës, të krishterët lënë me të vërtetë të veprojë mbi ta fuqia shndërruese
e Ungjillit”. Është shumë e thjeshtë, vazhdoi Papa Racinger, të tërhiqesh
nga mundësitë gati të pakufizuara, që ofrojnë shkenca dhe teknika, por, të vetme,
ato nuk mund të plotësojnë nevojat më të thella të njeriut. Nuk duhet të harrojmë
se nuk jemi të vetëm në botë, por jetojmë me të tjerët e kemi përgjegjësi edhe për
ta: “Ky theksim i individualizmit ka ndikuar madje edhe mbi kishën, duke bërë
që të fillojë një lloj bamirësie, e cila nganjëherë nënvizon marrëdhëniet tona private
me Zotin në dëm të thirrjes për të qenë anëtarë të një bashkësie të shëlbuar. Nëse
duam me të vërtetë ta fiksojmë vështrimin tek Ai, burimi i gëzimit tonë, duhet ta
bëjmë si anëtarë të Popullit të Zotit. E nëse kjo do të dukej kundër kulturës së sotme,
do të ishte thjesht një provë e mëtejshme e nevojës urgjente për të riungjillëzuar
kulturën”. Më pas, Ati i Shenjtë foli për rolin e laikëve në Kishë e për formimin
e tyre, duke përmendur shkollat e shumta katolike që ekzistojnë në SHBA, si edhe prestigjin
e tyre të pamohueshëm. Por për katolikët, sidomos për ata që u kushtohen veprave të
bamirësisë, theksoi Papa, duhet edhe i ashtuquajturi “formim i zemrës”, pra një takim
me Zotin përmes Krishtit, që të ngjallë dashuri në shpirtin e tyre e të bëjë që ta
hapin zemrën ndaj të tjerëve. E këtu, detyra e ipeshkvijve është e qartë. Ata duhet
t’u sigurojnë katolikëve një formim të qëndrueshëm moral, sidomos atyre që impenjohen
në sferën e shëndetësisë. E më pas, të marrin pjesë në debatin civil e publik: “Ndikimi
i Kishës në debatin publik është i qartë e bëhet në shumë nivele të ndryshme… janë
aktualisht shumë ligjet në fuqi o në diskutim, që ngjallin shqetësim nga pikpamja
e moralit dhe bashkësia katolike, nën udhëheqjen tuaj, duhet të ofrojnë një dëshmi
të qartë e unitare mbi çështje të tilla…” Vetëm fakti që një person e quan
veten katolik nuk duhet të na bëjë të mendojmë se ai vepron sipas mësimeve etike të
Kishës. Është detyra e ipeshkvijve ta ndihmojnë shoqërinë të reflektojë mbi këto argumente,
nënvizoi Papa. Ati i Shenjtë vuri në dukje shqetësimin e thellë të Kishës për
gjendjen e familjes në shoqëri dhe detyrën e patjetërsueshme të ipeshkvijve për të
sqaruar mirë argumentet e fesë e të arësyes, që flasin për martesën, si impenjim jete
për burrin e gruan e si qelizë e rigjenerimit të jetës. Benedikti XVI vuri gishtin
në plagët e shoqërisë amerikane, në këtë drejtim: “Shihet një ulje alarmuese
e martesave katolike në SHBA, sëbashku me një rritje të bashkëjetesave, në të cilat
dhurimi i anasjelltë i bashkëshortëve sipas mënyrës së Krishtit, përmes vulës së një
premtimi publik për të jetuar kërkesat e një impenjimi të pandashëm për gjithë jetën,
thjesht mungon. Në rrethana të tilla, u mohohet fëmijëve një ambient i sigurtë për
të cilin kanë nevojë që të rriten si njerëz, madje i mohohen shoqërisë ato shtylla
të qëndrueshme, të nevojshme për të ruajtur kohezionin dhe qendrën morale të shoqërisë”. E
Papa nuk mungoi të fliste për një temë të vështirë për Kishën amerikane, atë të abuzimit
ndaj të miturve, duke kujtuar se si vetë ipeshkvijtë kanë denoncuar se nganjëherë
ky problem është konsideruar në mënyrë jo të drejtë nga vetë kisha amerikane. Njerëz
të Kishës – theksoi Papa – kanë tradhëtuar detyrimet e tyre meshtarake me një sjellje
të pamoralshme shumë të rëndë. Masa disiplinore për fajtorët dhe krijimi i një ambienti
të sigurtë për të mbrojtur të rinjtë: kjo është rruga e zgjedhur nga ipeshkvijtë amerikanë,
por Papa shkon edhe më tej: “Nëse duam që këto masa të arrijnë qëllimin e plotë,
duhet që të vendosen në një kontekst më të gjerë. Fëmijët kanë të drejtë të rriten
duke e kuptuar drejt seksualitetin dhe rolin e tij në marrëdhëniet njerëzore. Atyre
nuk duhet t’u paraqiten shfaqjet degraduese dhe manipulimi vulgar i seksualitetit
që sot mbizotëron; ata kanë të drejtë të edukohen sipas vlerave morale të rrënjosura
në dinjitetin e njeriut. E kjo na shtyn të vemë në qendër familjen e të promovojmë
Ungjillin e jetës. Ç’do të thotë të flasësh për mbrojtjen e fëmijëve, kur pornografia
dhe dhuna mund të shihen në kaq shumë gjëra përmes mas mediave, aq shumë tëpërhapura
sot? Me urgjencë, duhet të riafirmojmë vlerat që e mbajnë shoqërinë, që t’u ofrojmë
të rinjve e të rriturve një formim të qëndrueshëm moral”. Duke cituar Papën
Gjon Pali II, Benedikti XVI kujtoi se në rastin e shpërthimit të shkandullit të abuzimeve
seksuale në kishën amerikane, paraardhësi i tij pati thënë se duhet të kemi besim
se kjo kohë spastrimi në gjirin e Kishës Katolike do të sjellë meshtarë më të shenjtë,
ipeshkvij më të shenjtë e një Kishë më të shenjtë. Edhe këtu, ipeshkvijtë kanë për
detyrë të jenë udhëheqës të denjë të meshtarëve të tyre, t’i shtyjnë të imitojnë Krishtin
e të shenjtërojnë jetën, të luten, sepse – theksoi Papa – koha e kaluar në lutje nuk
është kurrë kohë e humbur, sado të rëndësishme të jenë detyrat që ushtrojnë presion
nga çdo anë. Ipeshkvijtë amerikanë i bënë Atit të Shenjtë pyetje që kishin të
bënin me sfidat e shekullarizimit e me relativizmin intelektual, me atë proces të
heshtur, në të cilin katolikët dalëngadalë largohen nga kisha dhe nga identifikimi
i tyre me të, si edhe për rënien e thirrjeve për meshtari. Po citojmë diçka nga përgjigjet
e Papës Benedikti XVI. Përsa i përket shekullarizmit të shoqërisë amerikane, Ati
i Shenjtë vuri në dukje se si njerëzit kanë filluar të jetojnë sikur Zoti të mos ekzistonte,
pavarësisht se respektojnë rolin e Kishës e liritë fetare të individit. “…shekullarizmi
e sfidon Kishën që të ripohojë e të ndjekë edhe më aktivisht misionin e saj në e për
botën. Siç është bërë e qartë në Koncil, laikët kanë një përgjegjësi të veçantë për
këtë. Jam i bindur se është i nevojshme një kuptim më i mirë i marrëdhënieve të ngushta
që ekzistojnë ndërmjet Ungjillit e ligjit natyror nga njëra anë, dhe ndjekjes së të
mirës së përbashkët të njeriut, ashtu siç mishërohet nga ligji civil dhe vendimet
morale personale, nga ana tjetër”. E një nga sfidat është edhe largimi i heshtur
i katolikëve nga kisha. E këtu, Papa, pavarësisht se vë në dukje shkaqe si individualizmin
fetar e shkandullin që ka përjetuar kisha amerikane, vë sërish gishtin mbi plagë: “Të
shkojmë në thelb të çështjes: feja nuk mund të mbijetojë nëse nuk ushqehet, nëse “nuk
vepron përmes bamirësisë e dashurisë”. Njerëzit e kanë sot të vështirë të takojnë
Zotin në kishat tona? Predikimi ynë ndoshta e ka humbur kripën? A nuk varet kjo nga
fakti se shumë kanë harruar e madje nuk kanë mësuar kurrë si të luten në e me Kishën?
…feja e krishterë është kryesisht kishtare e pa lidhjen e gjallë me bashkësinë, feja
e individit nuk do të arrijë kurrë pjekurinë e vet”. Feja nuk është diçka thjesht
private, nënvizoi edhe një herë Papa, duke u kërkuar ipeshkvijve të gjejnë mënyra
të reja për të shpallur Lajmin e Mirë të shëlbimit në shoqërinë amerikane. E me sinqeritet,
theksoi se fakti që një Kishë ka shumë thirrje për meshtarë është shenjë e vitalitetit
të saj. Për pasojë, ulja e numrit të thirrjeve tregon se vetë kisha nuk lutet aq sa
duhet për vokacionet. Por Ati i Shenjtë sqaroi se e kishte fjalën edhe për lutjen
në përgjithësi, atë në familje, në programet e formimit të krishterë, për lutjen që
na ndihmon të njohim vullnetin e Zotit për jetën tonë. Më pas, Benedikti XVI nënvizoi
nevojën e formimit të shëndoshë intelektual të kandidatëve për meshtarë dhe të lënies
mënjanë të ndarjeve të kota brenda kishës. Në fund të takimit me ipeshkvijtë amerikanë,
Papa Benedikti XVI i dhuroi ipeshkvit të Nju Orleansit një kelshenjt, në kujtim të
punës së madhe të kishës me të shpërngulurit e uraganit Katerina në shtator të vitit
2005. Në orën 19. 30 me orën vendase, 01. 30 me orën evropiane, Benedikti XVI u
kthye në nunciaturën apostolike, ku kaloi natën. Sot, 17 prill, do të kryesojë
Meshën Shenjte në National Stadium (Nejshënell Steidium) të kryeqytetit, për të takuar,
pasdite, botën universitare katolike, ndërsa në mbrëmje, përfaqësuesit e feve të tjera.