365 ditë me njerëz e ngjarje që ia ndryshuan faqen botës.
(15.04.2008 RV)15 prill: Urdhëri
i Shën Gjonit të Jeruzalemit – urdhër i murgjërve ushtarë , që mbrojnë shtegtarët. Një
burrë troket në portën e spitalit. Pastaj shembet përdhe, sepse nuk ka më fuqi të
qëndrojë në këmbë. Ia beh menjëherë murgu rojtar i portës. “Jam shtegtar e kam
ardhur në këmbë nga Franca. Kur arrita në Jeruzalem, u sëmura, e….”. Burrit, që
i trokiti portës, i bie të fikët e nuk ndjen asgjë kur e mbartin me kujdes brenda
spitalit. Nuk e merr veten as kur murgjërit i bëjnë një banjo të ngrohtë, për ta pastruar
nga pluhurat e rrugës e për ta shpëtuar nga rreziku i ndonjë sëmundjeje ngjitëse.
Pas banjos e vendosin në një krevat të pastër e murgu farmacist e viziton me kujdesin
më të madh. Pastaj shkon të marrë ilaçin, për të cilin ka nevojë. Disa orë më vonë,
shtegtari zgjohet. Rrotullon sytë e shikon, aty pranë, një murg të Urdhërit spitalor
të Shën Gjonit. “Pas pak ditësh do të shëroheni. Tani pushoni e gëzohuni që arritët
në Jeruzalem. E di se nuk ishte aspak e lehtë. Qetësohuni, prandaj. Ka kush mendon
për ju: ne i mjekojmë të gjithë shtegtarët e sëmurë ose të plagosur. E s’janë të pakët,
sepse rruga nga Evropa deri këtu është tepër e gjatë. Pastaj saraçenët nuk tregohen
aq mikpritës, kur takojnë udhës të krishterë!”. “Kam dëgjuar se ju, përveçse mjekë,
jeni paksa edhe ushtarë e se keni edhe fortesa. Është e vërtetë?”. Infermieri vë
buzën në gaz. “Në radhë të parë jemi murgjër, murgjër që u shërbejnë të sëmurëve.
Por kohët e fundit shumë nga kryqtarët janë kthyer në Evropë. Kështu në Jeruzalem
e ndër viset e tjera të shenjta kanë mbetur pak kalorës për t’i mbrojtur shtegtarët.
E në se nuk do të ishin zëvendësuar, asnjë i krishterë nuk do të mund ta shkelte Tokën
Shenjte. Do të ishin dëbuar që të gjithë. Kështu pra, na duhet t’i mbrojmë: ju kanë
thënë të vërtetën. Ndërmjet tjerash, shumë nga murgjërit tanë e njohin fort mirë mjeshtërinë
e përdorimit të armëve, sepse kanë lindur në familje kalorësish”. Kjo bisedë zhvillohet
aty nga fundi i shekullit XII. Urdhëri i Shën Gjonit të Jeruzalemit ekziston prej
më se njëqind vjetësh. Por megjithëkëtë, saraçenët vijojnë të shtyhen gjithnjë më
thellë në trojet e shenjta: me kalimin e shekujve murgjërit kalorës detyrohen të sprapsen
e, në vitin 1523, dëbohen edhe nga Rodi, kështjella e tyre e fundme. Strehohen në
ishullin e Maltës, në qendër të Mesdheut, ku vijojnë veprimtarinë e tyre spitalore
e, për fat, tani nuk u duhet më të mbajnë në një dorë bisturinë e në tjetrën shpatën.
Sot, Urdhëri i Shën Gjonit, që njihet si Urdhër i Kalorësve të Maltës, zhvillon veprimtari
nga më të ndryshmet në të katër anët e botës; jep ndihmë të shpejtë, përgatit vullnetarë,
ndërton spitale, asiston të varfërit e njerëzit me të meta fizike. Eshtë, pra, edhe
sot e kësaj dite, një Urdhër jashtëzakonisht aktiv.