U kremtua sot Dita botërore e lutjes për thirrjet meshtarake. Benedikti XVI, në mesazhin
e rastit, i fton bashkësitë e krishtera t’ia kumtojnë Krishtin gjithë botës.
(13.04.2008 RV)“Çdo i krishterë është i thirrur ta dëshmojë e ta kumtojë Ungjillin,
në një botë ku një shumicë e madhe njerëzish nuk kanë pasur mundësinë të takohen me
Jezusin”. Kështu shkruan Papa në Mesazhin e Ditës botërore të lutjes për thirrjet
meshtarake me temë: “Thirrjet në shërbim të Kishës-mision”, që u kremtua sot. Papa
e nis Mesazhin, duke kujtuar fjalët e Krishtit: “Shkoni e bëni nxënës të mi të gjithë
popujt, duke pagëzuar në emër të Atit e të Birit e të Shpirtit Shenjt”. Kisha – shkruan
Benedikti XVI – është misionare në tërësi e në çdo gjymtyrë të saj. Por – saktëson
- në se në fuqi të sakramenteve të Pagëzimit e të Krezmimit, çdo i krishterë është
i thirrur ta dëshmojë e ta kumtojë Ungjillin, përmasa misionare lidhet posaçërisht
e ngushtësisht me thirrjen për rrugën e meshtarisë. Benedikti XVI nënvizon se dashuria
e Krishtit u duhet komunikuar vëllezërve me shembull e me fjalë. Më pas falënderon
misionarët, që e kumtojnë Krishtin dhe mbarështojnë sakramentet, duke rrezikuar edhe
jetën, si Mësuesi Hyjnor, në viset e botës ku vijon persekutimi. Vihen në shërbim
të njerëzve të vegjël, të sëmurë, të vuajtur, të varfër e të atyre që kalojnë çaste
të vështira. Japin, kështu, dëshmi prekëse, që mund të frymëzojnë shumë të rinj për
ta ndjekur Krishtin e për ta shkrirë gjithë jetën për të tjerët, duke gjetur jetën
e vërtetë. Kështu, përmes meshtarëve të tij, Jezusi bëhet i pranishëm ndërmjet të
gjithë njerëzve të sotëm, deri në skajet më të largëta të tokës.