Kardinali Martino në simpoziumin “Drejtësi e paqe”: “Të punosh për çarmatimin, do
të thotë të promovosh paqen parandaluese”.
(11.04.2008 RV)“Të promovohet kultura e paqes parandaluese”: këtë theksoi kardinali
Renato Rafaele Martino, kryetar i Këshillit Papnor të Drejtësisë e Paqes, duke hapur
sot paradite në Romë, seminarin ndërkombëtar të dikasterit vatikanas me temë: “Çarmatimi,
zhvillimi e paqja. Perspektiva për çarmatimin e plotë”. Të punosh për çarmatimin,
do të thotë të punosh për kulturën e paqes parandaluese. Kjo kulturë krijon kushtet
e përshtashme për t’ia prerë që në zanafillë rrugën konflikteve, të cilat mund ta
dëmtojnë, më pas, bashkëjetesën njerëzore me shkandullin e luftës. Këtë kujtoi kardinali
Martino, i cili në vijim shpjegoi se është detyrë e çdo njeriu të japë ndihmesën e
vet për çarmatimin. E këtë detyrë mund ta realizojë vetëm në se do të ketë guximin
të çarmartosë, së pari, zemrën e tij. Secili njeri – vërejti Hirësia e Tij – është
i thirrur të jetë veprimtar i paqes në jetën e vet e, prej këndej, në botë. Me këtë
kulturë të paqes – shtoi kardinali Martino – duhet të pajisen kryesisht drejtuesit
e institucioneve kombëtare dhe ndërkombëtare, që janë të thirrura për të krijuar frymën
e dialogut, të besimit reciprok e të mjeteve diplomatike për parandalimin dhe zgjidhjen
paqësore të konflikteve.Kryetari i Këshillit Papnor të Drejtësisë e Paqes shpjegoi,
më pas, edhe rolin e feve të mëdha, që duhet të bashkëpunojnë ngushtësisht për të
mbrojtur vlerën e dinjitetit e të jetës njerëzore si dhe për të promovuar pedagogjinë
e vërtetë të paqes.