Imzot Çelestino Miliore flet në OKB për popullsinë e zhvillimin dhe për pritjen e
vizitës së Papës.
(10.04.2008RV)“Atmosferë pritjeje,
e ngarkuar me shpresë”: kryeipeshkvi Çelestino Miliore e përmbledh kështu atmosferën
që ndjehet në SHBA, një javë para arritjes së Benediktit XVI. Në një intervistë dhënë
agjensisë SIR, vëzhguesi i përhershëm i Selisë së Shenjtë pranë Kombeve të Bashkuara
u ndalua posaçërisht tek vizita e Papës në Pallatin e Qelqit më 18 prill. “Shumë diplomatë
– theksoi - e ndjekin nga afër dhe e vlerësojnë qartësinë e mendimit të Atit të Shenjtë
si dhe frymëzimin që buron prej tij”. E pikërisht dje imzot Miliore mbajti një
fjalim në Komisionin e OKB-së mbi popullsinë dhe zhvillimin. Përballë fenomeneve
të emigracionit e të urbanizimit, nuk duhet harruar kurrë se protagonist është njeriu,
me të drejtat e tij - theksoi Prelati – dhe në vijim kujtoi se numri i popullsisë
qytetare e ka kaluar atë të popullsisë fshatare. Një fenomen i tillë krijon mundësi
të reja për zhvillimin ekonomik, por ka edhe pasoja çnjerëzore, sepse i shndërron
njerëzit në objekte, në vend që t’i shikojë si subjekte. Nga ana tjetër duhen analizuar
mirë edhe shkaqet që i shtyjnë njerëzit të emigrojnë, të lenë pas vatra, familje,
miq. Jeta larg familjes është një nga shqetësimet kryesore për emigrantët – kujtoi
prelati - prandaj theksoi se duhen ndihmuar për bashkmin familjar, sepse kështu mund
të japin një ndihmesë më të madhe për zhvillimin e shoqërisë së re ku jetojnë.Prelati
foli edhe për krijimin e mega-qyteteve, ku më se 840-milionë njerëz jetojnë në kushte
çnjerëzore, në sa 675 milionë të tjerë nuk kanë as ujin e pijshëm e 2 miliardëve u
mungon çdo lloj shërbimi shëndetësor. Në përfundim imzot Miliore theksoi se politikat
kombëtare e ndërkombëtare duhet t’u sigurojnë bashkësive fshatare shërbime shoqërore
më të shumta e më cilësore.