(09.04.2008 RV)Pesë vjetori i rënies
së regjimit të Sadam Hyseinit në Irak shtron para amerikanëve, por edhe para botës
në përgjithësi, pyetje mbi përparimet e vendit, të përdorur nga Uashingtoni për të
ashtuquajturin “eksportim të demokracisë”. Si sot, 5 vjet më parë, shtatorja e Sadam
Hyseinit hidhej poshtë në sheshin qendror të Bagdadit. Të dëgjojmë gazetarin italian
Alberto Negri, i dërguar i “Sole 24 Ore”: Unë isha në atë shesh, atë ditë,
kur u rrëzua shtatorja e Sadam Hyseinit. Nuk ishim më shumë se 200-250 vetë. Më pas,
sigurisht, në pamjet e transmetuara nga televizionet ndërkombëtare, dukeshin mijëra
njerëz përreth shtatores. Por, në të vërtetë, ishim vetëm qindra e përreth nesh, Bagdadi
i shkretë dhe i frikësuar, që priste të nesërmen. 5 vjet pas rënies së regjimit
të Sadam Hyseinit dhe pas ndërhyrjes amerikane, çfarë shpresash kanë irakianët? Para
së gjithash irakianët duhet t’i gjesh. Nuk është batutë, sepse nëse shkojmë në Bagdad,
apo në qytete të tjera irakiane, vemë re postblloqe e barriera, gjejmë ndarje, që
pasqyrojnë jo vetëm konfliktin ndërmjet amerikanëve dhe opozitës së armatosur, por
edhe atë ndërmjet sunitëve dhe shiitëve. Kjo është një luftë e vërtetë civile dhe
shiitët tashmë kanë në dorë dy të tretat e kryeqytetit. Spastrimi etnik dhe sektar
funksionon edhe në pjesën tjetër të vendit. Në veri, ka ndarë kurdët dhe shiitët,
ndërsa jugu është homogjen, shiit. Ta mbash të bashkuar këtë vend, nuk është e thjeshtë. Si
shihen sot amerikanët në vend? Amerikanët u kanë shërbyer si mjet shiitëve
për të marrë pushtetin. Kujtoj se shiitët përbëjnë 60% të popullsisë. Po u kanë shërbyer
edhe kurdëve për të krijuar një lloj gjysëm shteti, që më vonë mund të ketë edhe burimet
ekonomike për t’u bërë shtet efektiv. E kjo, megjithë pasojat në marrëdhëniet me Turqinë
e me Iranin. Sot për sot, roli i amerikanëve më duket ky: janë pushtues, po edhe mjet
në duart e fraksioneve të brendshme irakiane.