Jezusi i ngjallur në dëshminë e fesë të shqiptarëve. Me ne don Marko Njavi.
(08.04.2008 RV)Jezusi i ngjallur
ndriçon dëshminë e martirëve të fesë, të cilët vetëm në dukje munden nga dhuna e totalitarizmi.
Është pikërisht ajo forcë e dobët në dukje, që e bëri Krishtin të pranojë flijimin
në kryq, për shpërblimin e mëkateve të njerëzimit e që na bën të kuptojmë martirizimin
e sa e sa vetëve. Kështu tha dje Papa Benedikti XVI, në Liturgjinë e Fjalës të kremtuar
në Bazilikën e Shën Bartolomeut në Ishullin Tiberin në Romë. Pse regjimet u shfrynë
kundër këtyre njerëzve, shpesh gjeni kulture e dishepuj demokracie, përveçse ndjekës
të bindur të Krishtit. Të vlejë për të gjithë shembulli i At Anton Lulit, jezuit shqiptar,
i cili pas persekutimit, pas daljes nga burgu, si veprim të parë shkoi t’i thoshte
“të kam falur” persekutorit të vet. Si mund të torturosh njerëz të tillë dhe pse?
Flet don Marko Njavi (Marco Gnavi), aktualisht sekretar në Komisionin për dialogun
dhe ekumenizmin në dioqezën e Romës. Në vitin 2000 ka qenë anëtar i Komisionit për
Martirët e Rinj, sëbashku me Didier Rans, autorin e librit “Deshën të vrisnin Zotin”,
ku flitet pikërisht për persekutimin e Kishës në Shqipëri: Edhe unë e kam
takuar atë Anton Lulin në Shënkoll, në qelën e vet, pas rënies së regjimit komunist
shqiptar. Më bëri shumë përshtypje dëshmia e tij e panjollë. Në burg, kishte shkruar
edhe jetën e Jezu Krishtit. Na kanë ardhur shenja nga persekutimi i të krishterëve
në Shqipëri. Kujtoj se në Shkodër kremtoheshin fshehtas meshë. Në Bazilikën e Shën
Bartolomeut kemi një piksidë (kuti kungimi), që njëri nga martirët u ka dorëzuar miqve,
të cilët e kanë ruajtur. Pse këta njerëz konsideroheshin armiq nga regjimi
komunist? Pikë së pari, sepse ishin bij të Kishës katolike universale, që sheh përtej
kufijve kombëtarë. Së dyti, ishin tepër njerëzorë, tepër humanë. Ndërsa në Shkodër,
në katedralen e kthyer në Pallat Sporti, zhvilloheshin proceset kundër të krishterëve,
nga ana tjetër, regjimi ishte i detyruar të ndërtonte një impiant akuzash të gënjeshtërta,
sepse emri i mirë i këtyre njerëzve ishte një problem i vërtetë për krejt mekanizmin
çnjerëzor të çpërfytyrimit të njeriut, që përdorte komunizmi në këto shfaqje ekstreme
të tij. Kjo lloj armiqësie për njerëzit e çarmatosur të dashurisë universale mbijeton,
nuk është karakteristikë vetëm e regjimeve. Edhe sot persekutimi godet shumë të krishterë
të pambrojtur. Në jetën e tyre shkëlqen drita e Pashkëve e aty ku ka forca të errta,
që do të dëshironin ta ndalnin historinë deri në të Premten e Madhe, pa parë Ringjalljen,
pikërisht aty këta njerëz konsiderohen armiq e bëhet ç’është e mundur për tua mbyllur
gojën e për tua shuar jetën.