Takim në Vatikan mbi rolin e gjyshërve, pasuri për t'u vlerësuar nga shoqëria.
(03.04.2008 RV)“Gjyshërit, dëshmia dhe prania e tyre në familje”: kjo është
tema e Asamblesë XVII plenare të Këshillit Papnor për Familjen, që u hap sot paradite
në Sallën e Re të Sinodit, në Vatikan. Në qendër të vëmendjes - gjyshërit, që duhet
të jenë protagonistë në familje. Por, për fat të keq, jo gjithnjë ndodh kështu. Shpesh
roli i tyre nënvleftësohet nga shoqëria e, në radhë të parë, nga vetë bijtë e nipërit
e tyre, të cilët sillen me ta si të ishin të huaj, edhe atëherë kur nuk i braktisin
fare, sepse i konsiderojnë si barrë për jetën e tyre. Pikërisht këtyre njerëzve, mbartës
të një përvoje shumë të çmuar jete, u kushtohet mbledhja triditore e Asamblesë, që
u hap sot nga kardinali Alfonso Lopez Truhiljo, kryetar i Këshillit Papnor për Familjen.
Diskutantët e parë u ndalën posaçërisht në lidhjet ndërmjet dy brezave, duke theksuar
se “Të rinjtë e shikojnë me admirim e besim të moshuarin, kur shohin tek ai një model
që vlen të imitohet e një njeri të urtë, me të cilin ia vlen të këshillohesh për problemet
më të rëndësishme të jetës”.