Mollë sherri mbërritja e ndihmave ruse për serbët e Kosovës
(02.04.2008 RV)Ka mbërritur sot në Beograd avioni i parë rus me ndihma për
serbët e Kosovës, ndihma që shkojnë deri në 1,7 milion dollarë. Qeveria e Prishtinës
ka kërkuar që zhvendosja e mallrave brenda Kosovës të kontrollohet nga autoritetet
e jo nga UNMIK-u, i cili është i vendosur në kufirin verior të vendit. Në dy pikat
kufitare, që nuk kontrollohen nga qeveria e re e Kosovës, dhe që sigurojnë kalimin
nga Serbia në pjesën veriore të banuar nga serbë, sipas Prishtinës, UNMIK-u dhe KFOR-i
nuk kanë mandat për të kontrolluar mallrat, ndërsa sipas Moskës, i takon pikërisht
organizmave ndërkombëtare që të sigurojnë arritjen e ndihmave në Mitrovicë e gjetiu,
ku banojnë serbë. Ndërsa grinden për ndihmat, shqiptarët dhe serbët kanë gjetur
gjuhën e përbashkët për kontrabandën e karburantit. Policia kosovare zbuloi dhe arrestoi
një bandë “ndëretnike” kontrabandierësh, të cilët në gjashtë muaj, kishin gjetur dhe
shitur rreth njëmijë ton benzinë të ardhur nga Serbia. Kjo lloj kontrabande bëhet
edhe për mallra të tjera, si ilaçe, veshje e bagëti.