Raporti i Fides mbi krizën e familjes në Evropë: pakësohen lindjet, shtohen abortet
e pleqtë.
(01.04.2008 RV)Rritja e ngadalshme
e popullsisë evropiane, pakësimi i numrit të lindjeve, shkatërrimi i martesave, plakja,
shpenzimet sociale dhe numri i aborteve. Këto janë disa nga kapitujt e dosjes “Mbi
krizën e familjes në Evropë”, publikuar nga Agjensia Fides, organ i Kongregatës për
Ungjillëzimin e Popujve, lidhur me një raport, realizuar nga Rrjeti Evropian i Institutit
të politikës familjare për periudhën 1980- 2005. Posaçërisht alarmante, të dhënat
për numrin e aborteve. Kujtojmë se çdo 25 sekonda në Evropë bëhet një abort,
ndërsa çdo ditë mbyllen së paku tri shkolla, për shkak të mungesës së fëmijëve. Në
krye të listës është Spanja me një rritje prej 75%, pasuar nga Belgjika e Holanda.
Aborti – ilegal vetëm në tri vende – sipas Fides - është shkaku kryesor i vdekshmërisë
në Evropë; shkaqe të tjera janë sëmundjet, aksidentet rrugore, vdekjet nga përdorimi
i tepruar i alkoolit e i drogës. Për këtë atentat kundër jetës, gjithnjë në rritje
edhe në Shqipërinë, që dëshiron aq shumë të pranohet në gjirin e Bashkimit Evropian,
të dëgjojmë Karlo Kazinin, kryetar i Lëvizjes për Jetën: “Ka inkoherencë
në një Evropë e cila, nga njëra anë, nuk pranon vende të reja, në se nuk i respektojnë
të ashtuquajturat ‘të drejta të njeriut’ e nga ana tjetër, e konsideron abortin si
të drejtë themelore të njeriut, duke vijuar të besojë se e vetmja mënyrë për ta kufizuar
këtë genocid, është përhapja sa më masive e mjeteve që parandalojnë shtatzaninë. Të
çuditë, prandaj, fakti se pikërisht kombet si Franca e Anglia, ku këto mjete janë
më të përhapura, kanë një numër shumë të madh abortesh, gjithnjë në rritje. Evropa
jeton epokën e materializmit praktik, po nuk mund të mos theksojmë se jeta që nuk
i kushtohet përtëritjes së vetvetes, që nuk është e aftë të riprodhohet, nuk ka kurrfarë
vlere”. Duhet kujtuar se në vendet evropiane, paralelisht me pakësimin e fëmijëve
e shtimin e numrit të aborteve, shtohet edhe numri i të moshuarve, që ka arritur në
18 milionë vetë. Kontienti i vjetër e meriton vërtetë këtë emër, në sa jeton një
dimër të acartë demografik, me stuhi shoqërore, që lënë pas një numër gjithnjë më
të madh njerëzish të varfër e familjesh të shkatërruara . Statistikat flasin për më
se një milion divorce, që lidhen sa me mendësinë e aventurës, aq edhe me humbjen e
besimit për një ardhmëri më të mirë, që krijon kushtet e nevojshme për lidhje të qëndrueshme
martesore si dhe për lindjen, rritjen e sidomos, edukimin e fëmijëve.