Trashëgimia e martirëve e 40 vjetori i Bashkësisë së Shën Egjidit në qendër të vizitës
së Papës në Bazilikën e Shën Bartolomeut më 7 prill në Romë
Menjëherë pas njoftimit
për vizitën e Papës në Bazilikën e Shën Bartolomeut në program më datën 7 prill të
ardhshëm në ishullin Tiberin të Romës, Bashkësia kishtare e Shën Egjidit, përgjegjëse
e kësaj Kishe, dëshmon se e pret me padurim takimin me Benediktin e XVI-të, me rastin
e 40 vjetorit të lindjes së kësaj Bashkësie kishtare. Kujtojmë se kjo Bazilikë e Shën
Bartolomeut, me dëshirën e Papës Gjon Palit II është shpallur Shenjtërore e parë Përkujtimore
e Martirëve të Kohës Tonë. Po mbi pritjet e takimit të Bashkësisë së Shën Egjidit
me Papën, të dëgjojmë themeluesin e saj prof. Andrea Rikardin. “Ne po përgatitetemi
për pritjen e Atit të Shenjtë me një ndjenjë të thellë mirënjohjeje për dy arsye.
Së pari, sepse Ati i Shenjtë na sjell fjalën e tij e praninë e tij në 40 vjetorin
e themelimit tonë si Bashkësi. Per ne bijë të Kishës së Romës Ati i Shenjtë është
edhe ipeshkvi ynë dhe fjala e tij e ka udhëhequr gjithmonë udhën tonë. Kjo ndodhte
në kohën e Gjon Palit II e sot ndodhë me Benediktin e XVI. Pastaj është vizita në
Kishën e Shën Bartolomeut, të cilën Papa Wojtila na e ka besuar me rastin e 25 vjetorit
të Bashkësisë së Egjidit, kur erdhi për kremtimin e Meshës në Kishën e Shën Marisë
në lagjen Trastevere të Romës. Gjon Pali II e mbështeti idenë që kjo Kishë t’i kushtohej
martirëve të ri e prej atij momenti në këtë Kishë kemi gjithmonë një përkujtim ekumenik
të martirëve të ri. Tashmë është bërë një vend shtegtimi që ka pasur vizitën e patrikut
të Kostandinopojës Bartolomeut, që ka pasur vizitën e patrikut armen, të shumë figurave
të mëdha katolike e jo katolike. Pra shtegtimi në këtë vend për përkujtimin dhe nderimin
e martirëve të ri të kohës sonë, na bashkon dhe është trashëgimi e çmueshme për kohën
tonë. Bashkësia e Shën Egjidit shpesh herë i ka bërë pyetje vetes se të cilat janë
burimet e krishterimit në botën tonë bashkëkohore, dhe trashigimia e martirëve është
një trashigimi e fesë, e besnikërisë në fe dhe e qendresës në dashuri, pra ndoshta
është trashigimia më e çmueshme. Pra, edhe një përmasë ekumenike e martirizimit,
e dëshmisë që e shoqëron gjithmonë jetën e Kishës? Eshtë përmasë që Gjon Pali
II e nxiti në vitin 2000 kur tha: “Gjaku i martirëve flet më fuqishëm se ndarjet tona”.
E gjaku i martirëve flet për një krishterim të jetuar si dashuri deri në shenjën ekstreme
të vdekjes. Martirët nuk janë heronjë, por janë njerëz si ne që kanë pasur forcën
e gatishmërinë të jenë besnikë e besimtarë deri në fund. E ne duhet të mundohemi t’i
imitojmë.