365 ditë me njerëz e ngjarje që ia ndryshuan faqen botës.
27 mars: Shtjefni i Hungarisë kurorëzohet mbret me bekimin e Papës. Delegatët,
në një radhë të gjatë, presin të takohen me Papën. Njëri pas tjetrit hyjnë e dalin
nga dhoma ku i pret Silvestri II. Tani e ka radhën abati Astrik, që paraqitet para
Papës në emër të Shtjefnit, princit të Hungarisë. Vjen të kërkojë bekimin për mbretin
e ardhshëm. Jemi në vitin njëmijë e Shtjefni, që zë vendin e të jatit në fronin hungarez,
dëshiron të lyhet me vajin shenjt në ditën e kurorëzimit, për ta lëshuar kështu mbretërinë
e tij në dorë të Zotit. Kërkesa që murgu Astrik bën për princin e vet, nuk është
thjeshtë dëshirë, as formalitet. Shtjefni e ka njohur Hyjin dhe është pagëzuar: beson
me gjithë zemër, prandaj dëshiron që mbretëria e tij të kremtojë lumninë e Hyjit e
vendi i tij të bëhet katolik. Bekimin e kurorëzimit e shikon si gurin e themelit e
si hapin e parë për realizmin e planeve të tij. Papa ka dëgjuar prej kohe të flitet
për djaloshin Shtjefën e për fenë e tij të flaktë. E pranon me kënaqësi kërkesën e
Astrikut dhe i dorëzon një kurorë ari, stolisur me gurë të çmuar, shoqëruar me kryqin
apostolik dhe me bekimin papnor, duke e njohur kështu botërisht si mbret të krishterë.
Silvestri II nuk do të pendohej kurrë për këtë titull tejet të lartë nderi: Shtjefni
do të ishte një nga mbretërit më të mëdhenj katolikë. Shtjefni i Hungarisë i qëndron
gjithë jetën besnik Hyjit, që i dha kurorën. Kur zgjidh probleme të ndërlikuara politike,
falënderon menjëherë Zotin e, kur i peshon rëndë mbi supe barra e detyrave të mbretërisë,
ia beson veten Virgjërës Mari. Mendon se të jesh mbret, është dhuratë e Hyjit. Prandaj
duhet të veprojë me bindjen se e ndjek kudo e në çdo veprim vetë syri i Zotit. Po
Shtjefni nuk është vetëm mbret i madh, është shumë më tepër: ai njihet si themelues
i Kishës në Hungari. Papa i beson detyrën ta organizojë Kishën në vendin e vet e Shtjefni
e kryen këtë detyrë me zell të madh: e ndan vendin në ipeshkvni, ndërton abaci, kisha,
shkolla, katedrale. Krijon strehë të posaçme për pritjen e shtegtarëve. Për nder
të Zojës së ngjitur në qiell, ndaj së cilës ka devocion të posaçëm, e shpall 15 gushtin
‘Ditë të Zojës së Bekuar’. Gjithë jetën e tij, Shën Shtjefni e sundon Hungarinë duke
ecur pa dredhuar për asnjë çast, në rrugën e ndritur të Hyjit.