Benedikti XVI do të kremtojë më 2 prill në Shën Pjetër Meshën në tre vjetorin e Gjon
Palit II. Në mikrofonin tonë kardinali Saraiva Martins.
(25.03.2008 RV)Më 2 prill 2008
mbushen tri vjet nga vdekja e Shërbëtorit të Zotit, Papës Gjon Pali II. Pikërisht
në 10.30 të asaj dite, Papa Benedikti XVI do të kryesojë një Meshë të përshpirtshme
në kujtim të tij në tremen e Bazilikës së Shën Pjetrit në Vatikan. Janë të shumtë
ata që duan ta shohin sa më shpjet Gjon Palin II në mes të aradheve të shenjtërve,
të njohur nga Kisha. Më 28 prill 2005, as një muaj pas vdekjes dhe pa pritur pesë
vjetët e detyrueshme për praktikat e zakonshme në këto raste, Papa Racinger dha lejen
për fillimin e Çështjes së lumnimit e të shenjtërimit të Vojtilës. Në prill 2007,
dy vjet pas vdekjes, në bazilikën e Shën Gjonit në Lateran, kardinali Kamilo Ruini
e deklaroi të mbyllur fazën e parë dioqezane të procesit të Lumnimit, duke dorëzuar
krejt dokumentat në dikasterin kompetent vatikanas. Pikërisht, prefektit të këtij
dikasteri, të Kongregatës për Çështjet e Shenjtërve, kardinalit Hosè Saraiva Martins
i kërkuam të na shpjegojë se në ç’fazë është pjesa e dytë e procesit. Ta dëgjojmë… Të
gjithë ne e kujtojmë ditën e funeralit të Papës Vojtila, kujtojmë thirrjen “Shenjt
menjëherë!”. Ajo britmë, ajo thirrje në sheshin e Shën Pjetrit shprehte më së miri
mendimin e njerëzve: ajo thoshte se Gjon Pali II me të vërtetë gëzonte një famë shenjtërie
ndërmjet besimtarëve e, kjo e dimë mirë se është themelore në një proces Lumnimi.
Nëse nuk do të ekzistonte kjo famë shenjtërie, nuk do të mund as të fillohej një Çështje
lumnimi. Përsa i përket gjendjes aktuale të procesit të Lumnimit të Gjon Palit II,
çdo proces ka dy faza themelore: një dioqezane, lokale, dhe tjetra që ne e quajmë
“romake”, në nivelin e Selisë së Shenjtë. Hirësi, në ç’pikë është faza e
dytë, pra faza romake e procesit të Lumnimit? Sapo morëm dokumentacionin përkatës,
ne emëruam një postulator për fazën romake, i cili është po ai i fazës dioqezane.
Kemi emëruar edhe një relator, i cili do të udhëheqë postulatorin për të hartuar të
ashtuquajturën “positio”, pra grumbullimin e të gjitha dokumentave të organizuara
në mënyrë sistematike dhe të rregullt. Kjo “positio” shtypet dhe më pas studiohet
nga organet e ndryshme kolegjiale të dikasterit. Në këtë moment, jemi në nivelin e
hartimit të “positio”-s nga postulatori i Çështjes së Lumnimit të Gjon Palit II, pra
në nivelin e hartimit të atij vëllimi apo vëllimeve, nuk e di sa do të jenë, që pastaj
do t’i dorëzohen dikasterit. Pra, koha nuk varet nga dikasteri, por nga koha që i
duhet postulatorit për të përfunduar punën. Nuk e di sa muaj, ndoshta një vit… nuk
e di as unë e ndoshta as ai vetë. Ajo që mund të garantoj unë është se sapo të kemi
marrë në dorë “positio”-n do ta studiojmë menjëherë pa humbur kohë, pasi sigurisht
dikasteri dëshiron që Gjon Pali II të arrijë sa më shpejt në nderimet e elterit, që
të mund të quhet “i Lum” e kështu t’i përgjigjemi thirrjes në sheshin e Shën Pjetrit:
“Shenjt menjëherë!”