Benedikti XVI:Ngjallja e Krishtit burim shprese për botën.
(24.03.2008 RV)Sot Papa e kremtoi lutjen e Mbretëreshës Qiellore nga Kastel
Gandolfo, ku ndodhet që dje mbasdite e ku do të qëndrojë deri në fund të javës. Ati
i Shenjtë e nisi lutjen me shpjegimin e fjalës ‘Aleluja’, brohori që jehoi përsëri
në Kishë në Natën e Pashkëve, pas ditëve të gjata të Krezhmëve. “Aleluja, fjalë
hebraike e njohur universalisht – shpjegoi Papa – do të thotë ‘Lavdërojeni
Zotin’. E në ditët e kohës së Pashkëve, kjo ftesë për lavdërim kalon nga goja në gojë,
nga zemra në zemër”. Rijehon duke u nisur nga një ngjarje krejt e re: nga vdekja
e ngjallja e Krishtit – tha Ati i Shenjtë – duke kujtuar, në vijim, se për herë të
parë Aleluja lulëzoi në zemrat e nxënësve e nxënëseve të para të Jezusit ditën e Pashkëve
në Jeruzalem… Na duket sikur i dëgjojmë edhe sot zërat e tyre, zërin e Marisë së Magdalës,
e para që e pa Zotin e ngjallur në kopshtin pranë Kalvarit; zërat e grave, që e takojnë,
nësa vraponin, të trembura e të lumtura, për t’u dhënë apostujve lajmin e varrit të
zbrazët; zërat e dy dishepujve, që ecnin drejt Emmausit me fytyra të trishtuara e
që më pas rikthehen në Jeruzalem plot gëzim, sepse dëgjuan fjalën e tij dhe e njohën
‘në të thyer të bukës’. Pastaj zërat e njëmbëdhejtë Apostujve, që po atë natë e panë
mes tyre në çenakull, e Ai u tregoi plagët e gozhdave e të heshtës e u tha: “Paqja
qoftë me ju!”. Kjo përvojë e shkroi një herë e përgjithmonë Alelujën në zemrën e Kishës
– theksoi Ati i Shenjtë. Më pas shpjegoi edhe lutjen që të të krishterët e thonë
gjatë gjithë Kohës së Pashkëve, në vend të lutjes së Engjëllit të Tënzot: antifonën
mariane të Mbretëreshës qiellore. Teksti, krejt i shkurtër, ka formëm e një kumtimi:
është si një lajm i ri që i vjen Marisë, të cilin këtë herë nuk e sjell Engjëlli,
por të krishterët, që e ftojnë të gëzohet, sepse i Biri, që e mbajti në prehër, u
ngjall, ashtu siç kishte premtuar. “Në të vërtetë, ‘gëzohu’ ishte fjala e
parë që i drejtoi Marisë Lajmëtari qiellor në Nazaret. E kishte këtë kuptim: ‘Gëzohu,
o Mari, sepse Biri i Hyjit është duke u bërë njeri në Ty!” . E tani
– shtoi Papa – pas dramës së Mundimeve, jehon përsëri ftesa për t’u gëzuar: Gaude
et lǽtare, Virgo Maria, alleluia, quia surrexit Dominus vere, alleluia” – Gëzohu e
ngazëllehu, o Virgjër Mari, aleluja, sepse Zoti vërtetë u ngjall, aleluia! E pas
lutjes së Mbretëreshës Qiellore, Papa i ftoi të gjithë besimtarët t’i hapin zemrat,
që aleluja e Pashkëve të lërë aty gjurmë të thella e të mos mbetet thjeshtë fjalë,
por të bëhet shprehje e vetë jetës së secilit: jetë njerëzish që i ftojnë të gjithë
për të lavdëruar e Zotin dhe e bëjnë këtë si ‘të rilindur’. Në përfundim të lutjes
së Mbretëreshës Qiellore nga balkoni i selisë papnore të Kastel Gandolfos, Benedikti
XVI falënderoi autoritetet dhe popullsinë vendase për mikpritjen e përherëshme, u
uroi gjithë të pranishme ta kalojnë gëzuar të Hënën e Engjëllit dhe përsëriti urimin
e gëzueshëm të Pashkëve: Për shumë vjet!