(21.03,2008 RV)Kjo Udhë Kryqi u transmetua për herë të parë nga TVSH, duke
ndjekur drejtpëdrejtë Udhën e kryesuar nga Gjon Pali II në prill 1994, në Kolose. Programin
e hapi gazetari Ferdinand Samarxhi. Menjëherë pas tij nisi komenti nga studiot e TVSH
në Tiranë. Komentin e realizoi Dom David Gjugja, kryeredaktor i Programit Shqip pranë
Radio Vatikanit, ndërsa meditimet dhe lutjet u lexuan nga aktori i mirënjohur, Rikard
Ljarja, Pas transmetimit, që pati sukses të jashtëzakonshëm, TVSH vijoi ta transmetonte
edhe më 1995 e 1996Udhën e Kryqit të kryesuar nga Papa në Kolose, me komentet
përkatëse në gjuhën shqipe. Ja edhe teksti i plotë e kësaj Udhe Kryqi: PARAQITJE NJE NGJARJE E RENDESISHME EKUMENIKE Tekstet
e “Udhës së Kryqit” këtë vit i hartoi Shenjtëria e Tij, Bartolomeo I, Kryeipeshkëv
i Kostandinopojës e Patrik Ekumenik. Primati i Kishës së Kostandinopojës, që
ka për pajtor Andreun Apostull, i dhuron Ipeshkvit të Romës, pasardhësit të Pjetrit
Apostull, vëlla i Andreut, fjalët per meditim e lutje. Lindja e krishterë i bën dhanti
Kishës së Perëndimit traditën e vet teologjike, liturgjike e shpirtërore. Rëndësia
e kësaj ngjarjeje shihet qartë: Kishat e Lindjes dhe të Perëndimit përshkojnë së bashku,
me përvujtëri, Udhën e Kryqit, per të takuar të Ngjallurin. Së bashku ndalohen nën
Kryqin e Zotit, me Marinë, Nënën e tij, per të kundruar dhe ër të rijetuar misterin
e shëlbimit. Dhe lusin Atin e Jetës t’u japë hirin që përmes misterit të Kryqit e
të Ngjalljes, të munden, në bashkim të plotë, t’i çojnë botës Ungjillin e Shpëtimit. Kjo
lutje për bashkim ngrihet nga Kelku eukaristik i Darkës së Mbrame, nga gjaku i derdhur
për shpëtimin e shumë njerëzve. Ky Kelk, që i prin Udhës së Kryqit, ende nuk është
pirë. Kishat, megjithatë, vazhdojnë të luten që gjaku, i cili gurron nga kraharori
i të Kryqëzuarit, ai gjak që të gjithëve, pa dallim, u bën dhanti dashurinë e Hyjit,
të pihet përsëri në të njëjtin Kelk eukaristik. Udha e Kryqit 1994 është dëshmi
autoritare e kësaj dëshire për bashkimin ndërmjet Kishës së Lindjes dhe të Perendimit.
PROFUMI
I LINDJES SË KRISHTERË
Udha e Kryqit që kremtohet
në skenën e Koloseut, vend i ngarkuar me ngjarje historike, ku derdhën gjakun shumë
të krishterë në shekujt e parë, është një lutje tipike e traditës latine. Për këtë
arsye gjesti i Patrikut Ekumenik bëhet edhe më kuptimplotë: nga Selia e Andreut Apostull
i vjen një dhanti Selisë së Pjetrit Apostull. Në tekstet e stacioneve të Udhës së
Kryqit, Patriku paraqet një numër të madh përfytyrimesh të dashura për natyrën e Kishës
së tij, Kishës bizantine: Krishtin “hyjnor- njerëzor”, që mbart në “natyrën njerëzore
të Hyjit”, ankthin dhe shpresën e njeriut; kopshtin e Edenit, të mbyllur për shkak
të mëkatit të Adamit, njeriut të parë, që më në fund u hap përsëri nga Krishti, Adami
i dytë, nëpërmjet vdekjes dhe ngjalljes së tij; zbritjen e Zotit nën dhe, për t’i
shpallë njeriut në pritje, lajmin e fitores mbi çdo lloj vdekjeje; Nënën e Hyjit,
e cila ngushëllohet nga fjalët e të Birit: “Nënë, mos qaj!”, e që merr pjesë në mundimet
e tij e pret plot me shpresë Ringjalljen e tij; misterin e Kryqit, i cili zbulon dashurinë
e jashtzakonshme (që kalon çdo masë njerëzore) të Hyjit për njerëzit; Sakramentet,
fillesë e krijimit të ri, që lind nga kraharori i Krishtit e mbi të cilin fryn posi
fllad, fuqia krijuese e Shpirtit Shenjt. Fjalët dhe simbolet e traditës lindore
shprehen me një gjuhë të pasur e të thekshme, që na zbulon dramat dhe etjen e njeriut
të ditëve tona për shpëtim, me vetëdijën se përgjigjen mund ta gjejë vetem në Kryqin
jetëdhënës të Krishtit. Pranë meditimit, ja edhe përfytyrimet, ikonat që shoqërojnë
skenat e ndryshme të Udhës së Kryqit, edhe ato të marra nga trashigimia e pasur e
Kishave të Lindjes. Fjalët dhe përfytyrimet shkrihen dhe e çojnë njeriun në thelbin
e së kremtes, në ftesën e fesë, në takimin me misteret që përfaqësojnë.
DËSHMIA
E PËRBASHKËT E FESË
Skema biblike e Udhës së Kryqit
lejon që të shpallet përballë botës, në shtegtimin e përvujtur të uratës, feja e përbashkët
në veprën shpërblyese të Jezu Krishtit. Përmes traditave të ndryshme liturgjike, përmes
gjesteve dhe fjalëve të ndryshme, përmes figurave të shumta që jane përdorur gjatë
shekujve nga përshpirtëria e popullit të krishterë, del në dritë feja e përbashkët
në Zotin, që për ne, njerëzit e për shpëtimin tonë, zbriti nga qielli e u bë njeri,
pësoi mundimet nën Poncin Pilat, vdiq e u varros. Kjo Udhë e Kryqit na kujton
edhe një herë se feja e përbashkët pasurohet nga sinfonia e mënyrave të ndryshme të
të shprehurit. Vetëm takimi i përvojave të ndryshme të krishtera, na jep mundësi t’i
kthejmë ikonës së Shelbuesit, vërtetësinë dhe bukurinë e saj të plotë. Ndjeshmëria
e lartë shpirtërore e Kishës Bizantine, e shprehur përmes një forme të veçantë përshpirtërie,
karakteristike për traditën perëndimore, di të nxjerrë nga peshtafi i traditës së
vet “gjëra të lashta dhe gjëra të reja”, që i flasin njeriut të sotëm, që i përgjigjen
pyetjeve dhe pritjeve të tij. Meditimet e Patrikut Ekumenik, të gërshetuara me
tekstet e Shkrimit Shenjt, me mendimin e Etërve të Kishes, e në mënyrë të veçantë,
me Liturgjinë e Javës së Madhe, bashkohën me traditën e lutjes së Perëndimit dhe bëhen
dëshmi e përbashkët e fesë në kremtimin e mundimeve të lumnueshme të Zotit Jezus,
në pritje të kthimit të tij përfundimtar. Në kujtim të mundimeve, përgjigje mahnitëse
që Jezusi i jep planeve të Atit për të mbledhur së bashku bijtë e shpërndarë të Hyjit,
(Gv.11, 51) zërat e Lindjes dhe të Perendimit shkrihen në një lutje të vetme:
O
Zot, bëj që zemrat tona prej guri të coptohen përballë mundimeve tua e të
bëhen zemra të ndieshme prej mishi! Bëj që Kryqi yt të zgjidhë paragjykimet tona! Bëj
që të mos shtiem më në short petkat tua, me rrezik që të grisim mantelin një
cope të Kishës sate. Ty, o Atë, nëpër Krishtin, në Shpirtin Shenjt, çdo nderim
e lumni të qoftë në shekuj të shekujve ! Piero Marini Mjeshtër
i Kremtimeve Papnore. LUTJA FILLESTARE
Ati
Shenjt: Në emër të Atit e të Birit e të Shpirtit Shenjt. Kthesa: Amen
!
Vëllezër e motra, në Kishë, nëpër hirin e Shpirtit Shenjt, ne jemi
bashkëkohës të Jezusit. Mundimet e tij, vdekja e tij, varrosja e tij, zbritja
e tij fitimtare në botën e të vdekurve, zhvillohen në praninë tonë, zhvillohen
në ne. E varri i hapur në shkëmb është kjo botë mbi të cilën vdekja ka vënë
vulën e vet.
Krezhmët arrijnë kulmin në këtë Udhë të Kryqit, në këtë
shtegtim shprese, që na përcjell në Natën e Pashkëve, më të ndritur se drita. Duke
medituar tekstet, ndoshta ndër më të thellat e Ungjillit ne përgatitemi ta shoqërojmë
Jezusin, si e shoqëronte Nëna e tij, me zemrën e përshkuar tej për tej nga një
shpatë. E pra, zëri i Jezusit pëshpërit ëmbëlsisht: “Mos qaj, Nëna ime, sepse
në të tretën ditë unë do të ngrihem fitimtar!”. Gjithë historia e botës përmblidhet e
merr tërë kuptimin e vet në këto tri ditë, kur Hyji – Njeri vjen të na kërkojë
jo më mbi Malin e Shdërrimit, por në greminë e terr. Ai, i Pa Ndashmi, vetë
qenia e të cilit është bashkim, na çon të gjithëve drejt Atit dhe ndërhyn përgjithmonë
ndërmjet nesh e asgjësë.
TE LUTEMI: O Zot, bëj
që zemrat tona të gurëzuara të coptohen duke parë mundimet tua e të bëhen zemra
të ndieshme prej mishi! Bëj që Kryqi yt të zhdukë paragjykimet tona me vegimin
e luftës sate sfilitëse kundër vdekjes, ta zhdukë indiferencën tonë e kundërshtimin
tonë ! O Zot, bëj që të mos shtiem më short, sikurse ushtarët, te këmbët e Kryqit; mos
shtiem më short, të shtyrë nga një hisori e verbër dhe e marrë, mbi petkat tuaja,
me rrezikun që të grisim mantelin një cope të Kishës sate !
Nëna e Hyjit
na priftë për të kuptuar misteret tua, misterin e dashurisë të së Shenjtërueshmes
Trini, përse kur ti vuan, Ati është në ty, E kur vdes, Shpirti Shenjt rri zgjuar
mbi ty !
Ty, o Atë, nëpër Shpirtin Shenjt, nder e lumni të qoftë
në shekuj të shekujve !
K/ Ashtu qoftë ! (Amen) STACIONI
I: JEZUSI NE KOPSHTIN E ULLINJVE Nga Ungjilli sipas Markut: Mk.
14, 32-36 Dhe arriten në një vend që quhet Gjetseman. Jezusi mori
me vete Pjetrin, Jakobin e Gjonin. E u tha atyre: “Shpirti im është i trishtuar
për vdekje. Mos u largoni e rrini zgjuar”. U largua pak, ra përmbys për dhe
e lutej: “Abba! Atë! Ti mundesh gjithçka! Largoje prej meje këtë kelk! Por
jo çka dua unë, por çka don ti”.
MEDITIM: Kopsht i ullinjve
mijëvjeçarë: duhet të shtrydhen ullinjtë, e vaji prej zjarri, Shpirti Shenjt të
derdhet mbi plagët e botës.
O mundim i Jezusit, vetmi, miqtë me të
ngushtë i zu gjumi. O Zot, na çliro prej këtij gjumi, Kur mundimi i Krishtit
vazhdon në mundimin e njerëzve.
Mundimi i Jezusit, heshtja e Atit. Unë
e ti, Atë, jemi një, një vullnet i vetëm, një dashuri, por vullneti njerëzor
i Jezusit bërtet nga ankthi, sikur qenia e tij më e thellë, hyjnore- njerëzore, të
coptohej.
Vullnet njerëzor i Jezusit, solidaritet me të gjitha vetmitë; me
trishtimet e kryengritjet e ne të mërguarve, larg kopshtit!
Në Krishtin,
Hyji provon në natyrën e njeriut të gjitha agonitë tona, agoninë e pakufi të
historisë, britmën e pakufi të Jobit që ngrihet nga fatet tona, djersë gjaku.
Por,
ja! Shpresa ecën përpara përmes territ, zë i dridhshëm, ende i paqartë, jo
ajo që dua unë, por ajo që don ti... Pranim. Në Jezusin njerëzimi i shtrohet vullndesës
së Atit.
Ta lemë këtë vullndet të depërtojë përmes terrinave. Ullinjte
janë shtrydhur. Në çdo pemë zgjohet Kryqi fitimtar. Kopsht i zanafillës: “Sot
do të jesh me mua në Parajsë”. LUTJA: Fytyrë e përgjakur e
pra, fytyrë e Atit, e njëjta fytyrë që në hije, gjak kullon e të cilën ne s’e
njihnim.
Ti, tejét pranë, shndërroje ndër zemrat tona ankthin në
mirënjohje. Në të mundimi i njerëzve të bëhet ringjallje. Lavd e lumni ty,
O Krisht që bëhesh njëri prej nesh, më tepër se ne vete.
E mbush përplot
me ty, me dashurinë tënde, tërë ankthet tona – tërë vdekjet tona.
TË
GJITHË: Ati ynë…
STACIONI II: JEZUSI I TRADHTUAR NGA JUDA DHE
I ARRESTUAR Nga Ungjilli sipas Markut: Mk. 14,43 -46 Ndërkohë
ia behu Juda, njëri prej të Dymbëdhjetëve e bashkë me të, një shumicë e madhe njerëzish me
shpata e me shkopinj, të dërguar prej kreypriftërinjve, prej skribëve e prej
pleqve. Si iu afrua Jezusit, i tha: “Rabbì!” dhe e puthi. Ata vunë dorë
në të dhe e kapën.
MEDITIM: Njëra palë fle, tjetri - ai që
rri zgjuar tradhton. Plogështi, tradhti, thua kjo është historia jonë ? Puthja
që flet për dashuri shenj mërie bëhet. Gjithë mundimi i Jezusit tashti është
miqësia e tradhtuar, dashuria e shndërruar në urrejtje. Vetëtimë shpatash në
hije, po Hyji nuk mbrohet. Me nderimin e tij të pakufi për njeriun, në duar
kriminelësh lëshohet.
Dorëzohet ndër duar vrastarësh, ashtu si e lë
veten ta vrasin për t’u dhuruar atyre, përmes vdekjes, vetë jetën e vet.
Ata
që besojnë se Zotin e kanë të vetin, kryepriftërinj, skribë, pleq, Zotin e duan
të largët, sovran të paepur. E kur në mes tyre vjen Zoti i bërë Njeri, zemërbutë
e i përvujtë, ata e flakin në burg.
LUTJA: O Zot, nuk do të
jap puthjen e Judës, por, ashtu si hajduti, të njoh: të t’bjerë ndër mend për
mua kur do të jesh në mbretërinë tënde. Për Judën tjetër s’dijmë përveç dëshpërimit
të tij. Mëshira e Hyjit është e pakufi. Por ti, o Zot, çlirona nga Juda,
që secili prej nesh e ka në shpirt kur etja për para e për pushtet ne na sundon.
Kujtohu,
o Atë, se shpatat që Krishtin e përshkojnë e shkopinjtë që e godasin mund
të sjellin vdekjen - por jo mbi vdekjen të ngadhënjejnë.
Tepër shpesh
Kishat tona kanë përndjekur armiqtë e tyre. jepu tani të krishterëve forcën
e dashurisë së përvujtur.
TE GJITHE: Ati Ynë…
STACIONI
III: JEZUSI DENOHET NGA KESHILLI I LARTE Nga Ungjilli sipas Markut: Mk.
14,55. 60-61. 62. 64 Krerët e priftërinjve dhe mbarë Këshilli i lartë kërkonin
ndonjë dëshmi kundër Jezusit për ta vrarë, por nuk e gjenin. Atëherë u ngrit
kreyprifti në midis të Këshillit dhe e pyeti Jezusin me këto fjalë: “A je ti
Mesia, Biri i Hyjit të Bekuar ? ” Jezusi i përgjegji: “ Unë jam! ”. Të gjithë
gjykuan se meriton të vritet.
MEDITIM: Prej kohe njerëzit
e ditur e të pushtetshëm e dënojnë. Thonë disa: s’ka ekzistuar kurrë. Ndoshta
ka ekzistuar – të tjerët thonë, por ne për të asgjë nuk dimë. Ose ende: është
një profetë, profetë i madh por është njeri, asgjë më tepër.
E ne, mendojmë
pak për të. Jetojmë – sikur ai të mos kishte qenë kurrë. E pra, një ditë bëhet
pyetja: ‘A je ti Krishti, nëpërmjet të cilit Hyji i Bekuar na jepet ne?’.
Atëherë
me këmbanat e Kishave, me bukuri të ikonave në thellësi të zemrës sonë, Jezusi
copton heshtjen e thotë : ‘Unë jam!’, që do të thotë: Unë jam Hyji.
Tjetër
nuk mbetet: ose ta mbytësh, ose t’i biesh ndër këmbë, duke përsëritur ç’ka thënë: “
Të bekoj, o Atë, përse ia ke fshehur këto gjëra të diturve e të mençurve, e
ua ke zbuluar të vegjëlve”, përse kështu të ka pëlqyer”.
LUTJA: Jezus,
ti i pafaji, që vjen prej tjetër kund.. ne kemi etje të madhe për pafajni ne,
që çdo ditë e vrasim dashurinë.
Na jep bashkimin e te pafajve, të të
çmendurve në Krishtin, t’atyre që s’dijnë asgjë - asgjë - ndoshta përjashta tejet
-, kur i flakin në dhomat e gazit o në ferrin e të ftohtit, kur në dhoma
torturash i flakin, në atë dhomë torture, që është jeta vete.
Ti s’ke
ardhur për të dënuar, por për të shpëtuar, s’ke ardhur për të burgosur, por për
të liruar. Ndihmona me pafajsinë tënde në betejat tona, në luftërat e mëdha
të shpirtit, që të jenë pa dhunë e pa urrejtje. Me pafajsinë tënde, ndihmoi
dashuritë tona, familjet tona. Vëre pafajsinë tënde në shikimet tona që n’ty
të kundrojnë fytyrën e Atit, që në ty t’zbulojnë flakën e gjërave : ikona të
fytyrave.
TE GJITHE : Ati ynë…
STACIONI IV: JEZUSI
MOHOHET NGA PJETRI Prej Ungjillit sipas Markut: Mk.14, 72 Menjëherë gjeli këndoi për së dyti e Pjetrit iu kujtua
fjala që i tha Jezusi: “Para se gjeli te këndojë dy herë, tri herë do t’më
mohosh.”
MEDITIM: Gjeli lajmëron ditën, ditën që s’perëndon
të Mbretërisë së Hyjit. Atëherë trembet Pjetri: Mbretëria në të vërtetën nuk
vjen me ushtritë e engjëjve a të njerëzve, ngjeshur me shpata e armë të tjera. Po
vjen me vdekjen e vetvetes, e, pikë së pari, me vdekjen e Mësuesit.
“Jo,
kjo s’ka për të të ndodhë !” Pjetri i pati thënë Jezusit që e lajmëronte për
mundimet e veta. E pra – gjithçka po ndodhka.
Jezusi e kishte marrë
me mend ligështinë e fshehtë të të fortit, afshin e padurueshëm, që krejt papritmas
ndërron. “Përpara se gjeli të këndojë dy herë, tri herë do t’më mohosh !”.
Juda
ka shkuar të varet, i dëshpëruar nga shpëtimi, shi ditën e shpëtimit të përgjithshëm. Po
Pjetri shpërthen në lot. Lotët e Pjetrit Që lajnë mendjemadhësinë... Lotët
e Pjetrit... ai do te jetë i pari, por vetem si mëkatar i falur, për të qenë
i pari, jo në lavdi, por në dashuri.
LUTJA: O Zot, na jep lotët
e Pjetrit, atëherë kur s’ duam të dijmë se ti je e se janë mundimet - çmimi
i Pashkëve; pse ti vdekjen mund - po e mund me vdekje. Kur duam të harrojmë
se Kryqi është e vetmja pemë e jetës. Ne, krenarëve për fenë tonë, të etshëm
që të shijojmë dalldinë në prag po që papritur shembemi, na jep – o Zot – lotët
e Pjetrit, faljen tënde të pacak, na e jep!
TE GJITHE: Ati ynë... STACIONI
V: JEZUSI GJYKOHET NGA PILATI Prej Ungjillit sipas Markut: Mk.
15,14–15. Turma bërtiti edhe më më të madhe: “Kryqëzoje!” Pilati, duke
dashur të kënaqë popullin, ua lëshoi Baraben, kurse Jezusin, pasi e frushkulloi, ua
dha ta kryqëzojnë. MEDITIM:
Turma kishte brohoritur për
Jezusin, kur pati hyrë në Jeruzalem. Tani po ajo, bërtet: Vdekje ! Nuk janë
më njerëz, ata janë shkrirë, shdërruar në një bishë kolektive që etje ka për
torturë e për gjak.
Ç’e keqe ushqehet në zemër të njeriut? Ç’pushtet
terrinash bën që ky rit mizorie të verë në shenjestër të Pafajin ?
Jezusi
është mbret. Si mbret ka hyrë në Jeruzalem. E ja, tani, mbret pa qytet. I tillë
është Hyji ynë, që ne e përjashtojmë porsi krijues e që, mishëruar në krijim,
mbi vete merr çdo përjashtim.
O histori mizore, hipnozë e shkatërrimit: të
vrasësh, për të harruar se duhet të vdesësh! O histori mizore, po aq dhe ironike, sepse
Barabba do të thotë : “bir i Atit”.
E njeriu që sundon, Pilati, që tjetër
te vërtetë nuk njeh, veç pushtetin, turmën e lajkaton për t’i prirë në marrëzi e
për të shpëtuar rendin e Cesarit.
Urtësi e egër e sundimtarëve që turmës
ia flakin kurbanin e pajtimit.
Po shpejt gjithçka do të kthehet kokëtatëpjetë: përse
shërbëtori që vuan në se “ jetën flijon për shlyerjen e fajit, dritën do të
shohë, do të ngadhënjejë, e, nëpër të, tërë të përjashtuarit, të gjithë njerëzit
pa fytyrë, do të shohin dritë e do të nginjen.
LUTJA: O Zot
Jezus, mbret pa mbretëri, hapi portat e zemrave tona, që drita jote e ëmbël, e
ëmbël, por edhe e fortë – si jeta që mort s’ka të shndërisë në botën e Barabave
e të Pilatëve. Zot Jezus, i fshikulluar nga mëkatet tona, ti që nuk di as ç’është
e keqja e në heshtje pranon të shplakohesh, çrrënjose nga ne pjesën e hijes e
marramendthin e asgjësë, kështu s’ do te kemi më nevojë për flijen e pajtimit e
do të njohim në secilin njeri: “Bar – abba” – birin e Atit, gjaksorin që papritur
u lirua.
TE GJITHE: Ati ynë…
STACIONI VI: JEZUSIN
E FSHIKULLOJNË ME KAMXHIK DHE E KURORËZOJNE ME FERRA Prej
Ungjillit sipas Markut e sipas Gjonit: Mk. 15,17 –19;Gjn. 19. 5 Ushtarët e veshën me mantel të kuq dhe
si patën gërshetuar një kurorë me ferra ia vunë mbi krye. Atëherë filluan ta
përshëndesin: “Të fatemi, mbret i Judenjve!” Dhe i binin kresë me kallam, e
pështynin. Atëherë Jezusi doli jashtë me kurorë ferrash e me mantel të kuq. Pilati
u tha: “Qe njeriu !” MEDITIM: Kur kopshti i zanafillës
qe mbyllur, Hyji shpalli se toka do të lindte ferra, trualli do të mallkohej,
njeriu do të goditej prej vdekjes. Me ferrat e vuajtjeve tona, të urrejtjeve tona, të
kurorëzojnë xhelatët. Ati “mbi ty bën të bjerë mbrapshtia e të gjithëve”.
I
poshtëruar, ti gojen s’e hap, “si qengji që e shpien në thertore”.
Tërë
gjymtyrët e korpit tënd të shenjtë çnderimin duruan për ne. Duroi koka ferrat,
fytyra – shuplakat e pështymët; shpina duroi kamxhikun e dora duroi kallamin. E
pra ti je mbret, je mbret i Jetës.
Të kurorëzojnë xhelatët, me purpur
mbretëror të gjakut tënd të veshin një skepter tallës në dorë ta kanë vënë ; por
gjithsesi është skepter: pa e ditur, profetizojnë. E pra ti je meshtar me madhëri
te ëmbël e të qetë. Ti mbart dhimbjen e botës, për ta shkrirë në zjarrin e
dashurisë sate. Ti ishe në dasmë të Kanës, e tash je në dasmën e gjakut. LUTJA: Ja
njeriu! Njeriun na trego në çdo fytyrë njeriu të torturuar. Ja njeriu, tregona
njeriun në çdo fytyrë te urituri! E s’ka rëndësi në se është i uritur për bukë
– a për drejtësi ! Ja njeriu ! Me pangopësinë shtazore, i ngopur, që ecen
si gaforre drejt vdekjes. Na difto fytyren, fytyren tënde ! Dëftona te njeriu
shembëlltyrën e Hyjit!
TE GJITHE: Ati ynë... STACIONI
VII: JEZUSI NGARKOHET ME KRYQ Prej Ungjillit sipas Markut: 15,20 Pasi
e vunë në lojë, ia hoqën mantelin e kuq, ia veshën petkat e tija dhe e qitën
përjashta për ta kryqëzuar. MEDITIM: Pas petkut të purpurtë, përsëri
petku i bardhë. Pas mbretit – meshtari; dhe ja elteri i flisë: Kryqi ! E
nxorën përjashta, përjashta qytetit shenjt jashtë vendit shenjt, të mbrojtur
me afsh, që e përjashton dhunuesin. Tashmë është ai burimi i shenjtërisë, për
të s’ka asgjë që mund të jetë “ jashtë tij”, asgjë që nuk mund të jetë e shenjteruar.
Jashtë
e përcollën, larg tempullit ku therin qengjat. Eshte ai Qengji që mbart mëkatet
e botës! Ju tjetër tempull s’keni përveç se korpit të Tij: Eukaristia – streha
jonë! Përjashta e përcollën, larg njerëzve e larg Hyjit, prej atij Hyji që
ata thonë se e njohin, përse: “i mallkuar është ai që varet në dru, por Zoti
i vërtetë në të zbulohet ! E përcollën jashtë me Kryq ngarkuar!
LUTJA: O
Jezus, që të dëbuan, mos rri jashtë meje. Zemrën përsëri ma ndërto që të
jetë banesa jote.
O Jezus, që u dëbove, mos rri jashtë Kishave tona, nga
të cilat, duke të kundërshtuar, të dëbojmë!
Jezus që të nxorën jashtë që
askush mos te jetë më “jashtë ”, askush i përjashtuar nga sofra që ti na dhuron
nga breznia në brezni. O Jezus, tashmë je jashtë kësaj bote, ja, së shpejti
ke për ta shndëritë ! TE GJITHE: Ati ynë… STACIONI
VIII: JEZUSI NDIHMOHET NGA CIRENEU PER TE MBAJTUR KRYQIN Prej Ungjillit
sipas Markut: 15, 21 Ushtarët e detyruan një kalimtar që po
kthehej nga fusha, Simonin prej Cirenes, babanë e Aleksandrit e të Rufit, të
mbarte kryqin e Jezusit.
MEDITIM: Simon
është një emër judenjsh, por Cirene është qytet grek, diku në Afrikë. I kthyer
në tokën e etërve të vet, ai punonte tokën. Një katundar i fortë, zhyer me baltë
pjellore, ndoshta plot gëzim, pse pemët frytdhënëse janë në lulëzim. Ja, në
portat e qytetit kalon, e gjë s’kupton se ç’po ngjet. Oficeri i ushtrisë së
pushtimit shikon se është i fortë e i varfër, e urdhëron ta mbartë një copë
udhe kryqin e Jezusit.
Nuk është ai as dishepull e as mik. Apostujt
janë shpërndarë. E pra ai nuk tërhiqet e kryqin e mbart, që s’qe caktuar për
të.
Janë të shumtë ata që shtrëngohen të mbartin kryqe, pa e ditë se
mbartin Kryqin e Krishtit. E mbartin çdo herë që mposhtin egoizmin, për të ushqyer,
për të veshur, për të pritur të panjohurin. “Nuk të kemi njohur !” – i thonë Jezusit, Po
ai ua kthen: “Ma keni bërë mua! ”
Simoni kishte ende në sy pemën në lule, por
për nën gjakun e mpiksur ai ndoshta parandjeu një fytyrë prej drite, e e mori
me mend se mbarte shumë më tepër se një dru, i cili së shpejti do të thahej. E
mori me mend se mbarte: “Drurin e jetës”. LUTJA:
O Zot,
fati na shtrëngon të mbartim kryqin. Diftona se është yti e se në të vërtetë
i mbart ti kryqat tonë. O Zot, si kryq na mbartim epshet tona. Me dashurinë
tënde çlirona nga iluzionet, epshet tona ti shndërroi - ata që s’janë krejt
pa dashuri - shndërroi në mëshirë !
O Zot, na kryqin mbartim të vdekjes
sonë e të vdekjes së atyre që duam. Në ecjen e mundimshme përpara, diftona
se je ti që na pret, ti që në kryqin tim, bën Kryqin tënd, Kryqin e Ringjalljes! TË
GJITHË: Ati ynë… STACIONI IX: JEZUSI TAKOHET ME GRATE E JERUZALEMIT. Prej
Ungjillit sipas Lukës: Lk. 23, 27 -28, 31 Pas tij shkonte një
shumicë e madhe njerëzish, disa gra që qanin dhe vajtonin. Jezusi u kthye kah
ato dhe tha: “Bijat e Jeruzalemit, mos më qani mua, por qani vetën e fëmijët
tuaj! Sepse, në se veprohet kështu me dru të njomë, çka do të ndodhë me të thatin
? ” MEDITIM: Njerëzit e kanë dënuar Jezusin, po gratë
i shkojnë pas duke qarë... S’ka gra ndër armiqtë e Jezusit. Në shenj te amësisë
së fyer, godasin kraharorin me grushte.
Po Jezusi u thotë: “Mos qani! Mos
qaj, nëna ime! Pas tri ditësh - do te ngrihem”. S’duhet qarë për meshtarin që
kremton flijen e shenjtërisë së përgjithshme.
Mbi fatin e njeriut duhet
vajtuar, mbi atë që bën njeriu me fatin e vet. Lazri ka vdekur, e kufoma ka
marrë erë. Tashmë armiqtë rrethojnë qytetin, e forcat e asgjësë, njeriun e rrethojnë, e
zvarrisin drejt humnerës së zbraztësisë.
Jezusi merr mbi vete këtë fat,
për ta mundur, ai Lazrin e ngjalli prej të vdekurve. E ngutet për të përballuar
Atë që ndan, që s’ka me të kurrnjë farë bashkëpunimi që të mundet më në fund
një ditë t’i thotë: “ Unë teri çdo lot prej syve tuaj, vdekje s’ka më, s’ka
vaj, s’ka ankth, përse ç’ishte më parë, tani ka kaluar”.
LUTJA: Kulla
e Siloe të shembet vazhdon, Ushtritë qytetit vazhdojnë t’i vënë flakën. E gjithë
kjo ndodhë jo pse don të na dënosh, po pse ne bëhemi, o Zot, dru i thatë.
Ti,
dru përherë i blertë, jepna limfën tënde, që kështu të dimë t’i thajmë lotët nga
sytë e grave të Jeruzalemit.
Bëj që secili nga ne të jetë Veronika, që
djersën ia fshin fytyrës sate, që fytyra jote, përmbi ikonat tona, - çdo njeri
është ikona jote - për ne të jetë, o Zot, porta e amshimit! TE
GJITHE : Ati Ynë...
STACIONI X: JEZUSIN E KRYQEZOJNE
Prej Ungjillit sipas Markut: 15, 24 Atëherë e kryqëzuan
dhe i ndanë petkat e tija duke shtënë short – kujt t’i bjerë.
MEDITIM: Sot
është pezull mbi dru, ai që në pafundësi botët mban pezull, është mbërthyer
me gozhdë Dhëndërri i Kishës. Eshtë përshkuar me heshta, Biri i Virgjëreshës. Nderojmë
vuajtjen tënde, o Krisht, ardhtë të ngjallurit tënd.
Sot Jezusi provon tmerrin
e turpit, tendosur mbi kryq, dridhjen e ankthshme të shpirtit, e edhe përbuzjen
e njerëzve. Ai tashmë është vëlla me të torturuarit, me të dëshpëruarit, të
përbuzurit. Sot ai, i vetmi diell i gjallë, - Unë jam Ringjallja e Jeta - i
lindur nga Virgjëra - Zoja e Papërlyer, provon një mundim, përtej masës njerëzore.
Marrëzi
per ata që nderojnë mençurinë, për ne, pushtet i Hyjit e dituri e Hyjit. O Jezus,
me krahët përherë të hapur, nga gjoksi yt i shporuar gurron uji i Pagëzimit, e
gjaku i Eukaristisë. Vetem një pikë gjaku, përtrin gjithësinë. agimi i Shpirtit
lind nga korpi i munduar. Kishim nevojë që Hyu të mishërohjej e të vdiste, që
ne të rijetonim.
Druri i tupit, bëhet Dru i jetës, boshti i botës, që
mbledh çdo dhembje tonën, për ta flijuar në zjarrin e Shpirtit Shenjt.
Ngrihet
ky dru nga toka, arrin deri në qiell, është shkalla e Jakobit e shtegu i engjëjve, fryti
i tij ka brënda gjithë jetën, e hamë atë, e duke e ngrënë, më s’vdesim !
LUTJA: O
Kryq i Krishtit, ti vetëm mund të shqiptosh gjykimin që na dënon, ti vetëm zbulon
dashurinë e çmendur për Hyjin. O Kryq i Krishtit, E vetmja përgjigje që i jepet
Jobit, Jobëve të panumër të historisë: pamja jote shtyp ndër ne çdo kryengritje, e
bën qesharake çdo urrejtje.
O Kryq i Krishtit ! Na jep ndër çaste të
vështira hirin, të mos biem në dëshpërim, por ndër këmbët tua të përmbysemi, në
mënyrë që ai, i cili është lartuar mbi ty, të na tërheqë të gjithëve në lumturinë
e tij paradoksale. TE GJITHË: Ati ynë... STACIONI
XI: JEZUSI I PREMTON MBRETËRINË E VET HAJDUTIT TË MIRË Prej Ungjillit
sipas Lukës: 23, 39 – 43 Njëri nga kriminelët e kryqëzuar e fyente: “Po
a nuk je ti Mesia? Shpëtoje vetveten!” Po ai tjetri e qortoi shokun: “As ti
nuk e druan Hyun. Ne po marrim dënimin e merituar për veprat tona! Po ky, ky s’bëri
asnjë të keqe!” Dhe tha: “Jezus, të bjerë në mend për mua, kur të arrish në
mbretërinë tënde ». I përgjegji : ‘Për të vërtetë po të them, sot do të jesh me
mua në Parajsë’.
MEDITIM: Gjithë fati ynë përmblidhet
në fatin e dy keqbërësve. Nuk janë të huaj ata – janë ne. Duhet te zgjedhim,
rrugë tjetër s’ka: Keqbërësin n’ e djathtë, o n’ e mëngjër.
E prej keqbërësit
të së majtës Jezusit i vjen tundimi i fundit: “Në je ti Mesia, shpëtoje vetveten!”. Tash
priftërinjtë e ushtarët i patën thënë: “T’shpëtojë vetveten e na do t’i besojmë!” Por
ndërsa Krishti hesht, keqbërësi tjetër, duke iu sjellë te parit i thotë: “Ne
njerëzit vrasim e vritemi, vdekja është e shkruar në fund të shpirtit tonë. Po
në Jezusin, që s’ka kurrnjë të keqe, në Jezusin nuk ka fatalitet vdekjeje, por
vetëm vdekje për dashuri.
E banditi, i ngujuar nga gozhdat, ruan të
fundmen liri: - atë të fesë, e thërret: “Jezus, të bjerë në mend për mua, kur
të hysh në mbretërinë tënde!”
Nuk di kurrgjë, o Jezus, asgjë s’kuptoj, në
këtë botë tmerri. Po ti eja tek unë, me krahët hapur, me zemër hapur, mjafton
prania jote – është Parajsa ime. Te bjerë në mend për mua kur do të vish me
mbretërinë tënde. Lavd e lumturi ty, që pranon jo të shëndoshët, por të sëmurët, ti
që, si një mik të papritur, ke një kriminel të dëbuar nga drejtësia njerëzore. Tani
ti zbret në ferr edhe çliron Ata që besohej se ishin dënuar e që të thërresin ty:
“Të
të bjerë në mend për ne, o Zot, Kur do të vijsh me mbretërinë tënde!” TE
GJITHË: Ati ynë...
STACIONI XII: JEZUSI NË KRYQ,
NËNA DHE DISHEPULLI Prej Ungjillit sipas Gjonit: 19, 26 -27 Jezusi,
kur pa nënën e vet dhe, pranë saj, nxënësin që e donte, i tha nënës: “Grua,
qe yt bir!” Mandej i tha nxënësit: “Qe, nëna jote!” MEDITIM: Të
këmbët e Kryqit, Maria e Gjoni: Nëna e nxënësi më i dashur. Maria, Nëna e Hyjit,
ajo që i tha “po” engjëllit, duke zgjidhur madhërishëm tragjedinë e lirisë sonë. Ajo
e lindi, në pastrinë e pacënuar të trupit të saj. Tani një shpatë zemrën po ia
përshkon. Gjoni, i vetmi nxënës besnik, deri në fund të fundit. Në darkën e
Mbrame mbi zemrën e Mësuesit kryet e tij pushoi, pushoi mbi zemër të botës. Ai
i ruajti fjalët e Tij te fundit, bashkimin e Jezusit e të Atit, premtimin e
Shpirtit Shenjt.
Grua – thotë Jezusi, Grua: në të gjindet çdo butësi, çdo
bukuri femërore. O grua e fortë, e denjë në gjithçka, që ruan gjithë këto gjëra
në zemër tënde, yt bir i ngjallur do te zhduket nga sytë e njerëzve, por ja,
ti ke një bir në tënd bir. Rojtare e bijve në shpirt. O Nëna e gjithë njerëzimit: “
Të falem hirplote, Zoti është me ty!
E Gjoni e pret në shtëpinë e vet, në
dashurinë e vet, prani tashmë e heshtur, e heshtjes së madhe te adhurimit. Qoftë
kështu ajo ndër shtëpitë tona, nëna e çdo besnikërie, e çdo ngrohtësie. Qoftë
kështu në shtëpinë e mbarë botes, tokë që pjelloria kurrë nuk i shterron. Ja
e para Kishë, Lindur nga lënda e Kryqit. Kur Jezusi, duke përkulur kokën, jep
shpirt, kjo është si Rrëshajë e parë. LUTJA: Jezus, bir
i qiellit, për Atin tënd, Bir i tokës, për nënën tënde. Na bëj bij të tokës
e të qiellit nëpër lutje të Nënës së Hyjit.
Jezusit një heshtë gjoksin
ia ka përshkuar, ndoshta edhe zemrën. Dhe ty, Mari, një heshtë zemrën po ta
përshkon. O Zot, na bëj te hyjmë edhe ne në këtë shkëmbim të tmerrshëm, nëpër
lutje te Nënës së Hyjit. STACIONI XIII: JEZUSI VDES NË KRYQ Prej
Ungjillit sipas Markut: Mk. 15; 34. 36 – 37 Në orën tre, Jezusi
lëshoi një gjëmë të madhe: “Eloì, Eloì, lema sabactàni ? që përkthehet: “Hyu
im, Hyu im, përse hoqe dorë prej meje ? Njëri prej tyre u lëshua vrap, e lagu
shpuzën në uthull, ia dha ta pijë. Po Jezusi lëshoi një britmë të madhe e
dha shpirt.
MEDITM: Jezusi, Fjala e mishëruar përshkoi
distancën më të madhe që njerëzimi i humbur do të mund të përshkonte. “Hyji
im, Hyji im, pse më braktise?”. Distancë e pakufi, tortura më e tmerrëshme, çudi
e dashurisë.
Ndërmjet Hyjit e Hyjit, ndërmjet Atit e Birit të bërë njeri zgjatet
dëshpërimi ynë me të cilin Jezusi është solidar deri në fund.
Mungesa
e Hyjit është ferri vetë. “Kam etje !” thotë ende Jezusi, e përsërit fjalët e Psalmit: “E
tharë si një eshkë është goja ime, gjuha ime është ngjitur për qiellëz. Mbi
pluhurin e vdekjes më ke vendosur”.
Hyji ka etje për njeriun, e njeriu
i ikë, “një mur i ndan”. Jezusi i gozhduar mbi këtë mur, thotë: “Kam etje!” E
i japin uthull.
Përqafim i amshuar i Atit e Birit Bëhet distancë ndërmjet
qiellit e ferrit. “Eloì, Eloì, lema sabactàni?” sikur për një çast Hyu i
kryqëzuar të mos besonte.
Në këtë çast gjithçka përmbyset! Në Jezusin,
vullneti njerëzor, si në Gjetseman, pranon: “Atë, në duart tua po e dorëzoj
shpirtin tim !” Honi i dëshpërimit zhduket porsi një pikëz urrejtjeje qesharake. Distanca
ndërmjet Atit e Birit s’është më vend i ferrit, po i shpirtit. LUTJA: Jezus,
ti zhveshe vetveten duke pranuar kushtet e shërbëtorit, deri në vdekje, e në
vdekje në kryq. Na mëso të themi, në ditën e ankthit, o ndoshta të agonisë: “Atë,
ndër duar tua po e lë unë shpirtin tim!”. Tashmë qielli, toka, ferri, janë plot
me dritë. Asgjë s’më ndan më nga ti. “E ku mund të shkoj unë larg nga shpirti
yt?”. Në se zbres në ferr, - ja ku të kam ! O Bari i panjollë, më merr mbi
supet tua për të më çuar te Ati; Që në ty, njeriu më i pafe pushim te gjejë
më në fund. Lumturi, ty, o Jezus, Hyji ynë, ti kryqin e dëshpërimit e shndërron në
Kryq te Pashkëve ! TE GJITHE: Ati ynë...
STACIONI
XIV: JEZUSIN E VENDOSIN NË VARR PREJ UNGJILLIT SIPAS MARKUT: Mk.15,46 Jozefi i Arimatesë bleu pëlhurën e uli
nga Kryqi trupin e Jezusit, e mbështolli në pëlhurë dhe e vendosi në varr të
hapur në zemër të shkëmbit.
MEDITIM: Një Jozef
të ka mbrojtur kur ishe fëmijë, një tjetër Jozef të ulë ëmbël nga kryqi. Në
duart e tij ti je më i braktisur sesa një fëmijë ndër duart e nënës së vet. Ai
vendos në prehër të shkëmbit reliken e trupit tënd të panjollë. Guri u rrotullua, ra heshtja e varrit. Eshtë e shtuna misterioze. Gjithçka
ka heshtur, krijimi frymën mban. Në zbraztësinë e plotë të dashurisë, zbret Krishti, po
fitimtar.
Ai digjet nga zjarri i Shpirtit Shenjt. Në takim me Të, lidhjet
e njerëzimit përkryhen. O Jetë, si mund të vdesësh? Vdes për të shkatërruar
pushtetin e vdekjes e për të ngjallur të vdekurit nga ferri.
Gjithçka
ka heshtur. Po lufta e madhe merr fund. Ai që ndan, është i mundur nën tokë;
në sa në fund të shpirtrave tonë, një shkëndijë është ndezur.
Natëroje
Pashkësh. Gjithçka ka heshtur plot me shpresë. Adami i fundit, i zgjat doren Adamit
të parë. Nëna e Hyjit lotët Evës ia fshin. Rreth shkëmbit mortor – tash kopshti
lulëzon!
LUTJA: O Çliruesi im, pata ikur larg teje, në
zemrën e vdekshme te shkëmbit. Po ti shemb çdo mur, me vete i merr gjithë të
burgosurit: të burgosur të vetvetes a të djallit. I përcjell drejt agimit të
Pashkëve, përse dashuria e fortë është, si vdekja! E mbaj shpirtin tim në paqe e në heshtim, si fëmija që struket në gjirin
e s’ëmës. E di se ti do t’më gjesh!
Jezus mbretëror, shkëlqen përsëri
mes territ pishtar jete. Prej pranisë sate heshtimi rrënqethet, bota s’është
më një varr i zbrazët! Dy Adamët bashkohen në dritë, në varret nuk ka më të
vdekur. Krishti u ngjall nga të vdekurit, me vdekje vdekjen dënon. Atij
që është në varr ai i sjell jetë !