(17.03.2008 RV)Ndërsa palestinezët dhe izraelitët nuk gjejnë gjuhën e përbashkët
për procesin e paqes, në Tokën e Shenjtë ka filluar si kudo, Java e Madhe e Pashkëve.
Në mesazhin e tij të fundit të Pashkëve, pasi së shpejti mbush 75 vjeç dhe përfundon
mandatin, Patriku i Jeruzalemit të Latinëve, Mishel Sabah u kërkon palëve që të kuptojnë
se pas dhjetra vjetësh konflikti, ushtritë nuk i mbrojnë popujt, por i ekspozojnë
ndaj dhunës, frikës, pasigurisë. “Dhuna shkatërron e nuk ndërton” nënvizon Patriku.
Gjatë 20 vjetëve të fundit, prania e të krishterëve në Tokën e Shenjtë është ulur
nga 20% në 2%.
Në orën 17, me orën evropiane, ka skaduar ultimatumi që
autoritetet e Pekinit u patën dhënë tibetanëve. Revolta e rajonit autonom të Tibetit
kundër represionit kinez filloi që të premten e deri tani ka shkaktuar mëse 100 viktima,
sipas tibetanëve, e vetëm 13, sipas autoriteteve kineze. Udhëheqësi shpirtëror budist,
Dalai Lama flet për “genocid kulturor”. Forcat e policisë u janë përgjigjur me gaz
lotsjellës e me forcë protestave të tibetanëve. Manifestimet filluan në kryeqytetin
Lhasa, ku sot ka qetësi relative, për të vazhduar në qytetet e tjera. Bashkësia ndërkombëtare
ka dënuar reagimin kinez ndaj protestave të murgjërve budistë, por ka përjashtuar
për momentin mundësinë e bojkotimit të Olimpiadës, që do të zhvillohet vitin e ardhshëm
në Pekin.
Gjithnjë e më tepër nën presion presidenti francez Nikolas Sarkozì,
pas humbjes së qartë të Partisë së tij, UMP në zgjedhjet administrative në Francë.
Në ballotazhin e djeshëm, shumë qytete të rëndësishme si Tuluza dhe Strasburgu i kaluan
së majtës. Në nivelin kombëtar, Partia Socialiste e rivales së Sarkozisë, Segolen
Ruajal fitoi 49% të votave, ndërsa UMP-ja 47,5%. E majta kontrollon tani 58% të qyteteve
me mëse 30 mijë banorë. 40 qytete nga qeverisja e djathtë kanë kaluar në dorën e së
majtës. Rezultati do ta detyrojë presidentin francez të riformojë qeverinë dhe të
ndryshojë strategjitë. Është i nevojshëm përshpejtimi i ritmit të reformave, shkruan
gazeta pro-qeveritare “Le Figaro”. Konsensusi i francezëve për Nikolas Sarkozì ka
rënë nga 67% që ishte në korrik, në 40%-shin e tanishëm.