Benedikti XVI në Meshën për shpirt të imzot Rahho, uron që vdekja e prelatit t’i frymëzojë
të gjithë irakianët për të jetuar në paqe e drejtësi.
(17.03.2008 RV)“Njeri i paqes e
i dialogut, i dënuar me një fund çnjerëzor, pasuar nga një varrosje e padenjë”. Janë
fjalët e Benediktit XVI, i cili sot kryesoi, në kapelën e ‘Nënës së Shëlbuesit’ në
Vatikan, Meshën për shpirt të kryeipeshkvit kalde Paulus Faraj Rahho, vrarë në Irak.
Kështu Papa, thellësisht i prekur në shpirt, e nisi ditën e parë të javës me kujtimin
e prelatit të martirizuar të një toke edhe më të martirizuar, duke uruar që shembulli
i tij t’i ndihmojë të gjithë irakianët vullnetmirë në përpjekjen për ndërtimin e një
kombi paqësor e solidar: “Ashtu si kryeipeshkvi i dashur Paulos, që e shkriu
pa kursim jetën në shërbim të popullit të vet, edhe të krishterët duhet të punojnë
për ndërtimin e një shoqërie paqësore e solidare, që ecën në rrugën e progresit e
të paqes”.