Shpërthim në një depo armësh në Shqipëri. Bilanci i rëndë.
(15.03.2008 RV)Nuk dihet akoma se sa persona kanë humbur jetën në Shqipëri, pas
shpërthimit të depos së armëve në Gërdec afër Vorës. Akoma nuk dihet sa mund të jetë
numri i saktë i viktimave. Kryeministria bën të ditur se në momentin e shpërthimit
kanë qenë në punë 110 punonjës. Gjithçka filloi nga mesdita e ditës së
sotme, kur ushtarë shqiptarë dhe një ekip amerikan, i thirrur nga NATO, po bënin asgjësimin
e municioneve të depos, sipas një plani të parashikuar nga qeveria. Papritur ka pasur
një shpërthim, që është dëgjuar edhe në Durrës e Tiranë. Temperatura e lartë ka bërë
që shpërthimet të vazhdonin zinxhir edhe më vonë. Makinat që ndodheshin në autostradën
Tiranë-Durrës, pranë Vorës kanë pësuar dëme. Xhamat janë thyer duke shkaktuar plagosjen
e njerëzve që ndodheshin në to, ose pranë tyre. Për të mos folur për banorët e fshatit
Gërdec, të cilët kanë pasur viktima e dëme të mëdha materiale. Sipas lajmeve të fundit
zyrtare, numri i të plagosurve i ka kaluar 200. Ata kanë kërkuar ndihmë në spitalet
e Durrësit, në spitalin ushtarak në Tiranë e në Qendrën Spitalore “Nënë Tereza”, gjithnjë
në Tiranë. Në rrezik për jetën janë një pjesë e vogël e të plagosurve, ndër të cilët
një vajzë dy vjeçare, që është operuar për heqjen e dy plumbave. Ka filluar
gara e solidaritetit të qytetarëve, të cilët u janë përgjigjur në masë thirrjes për
dhurimin e gjakut. Vendet fqinje, Kosova, Maqedonia, Greqia, Italia, Franca dhe emigrantët
shqiptarë kanë treguar gatishmërinë e tyre për të bërë çdo gjë që t’u kërkohet në
ndihmë të personave të përfshirë në aksidentin e rëndë. Vendet fqinjë kanë vënë në
dispozicion qendrat e tyre për transfuzionin e gjakut dhe u kanë bërë thirrje qytetarëve
të ndihmojnë shqiptarët. Ministri i jashtëm i Maqedonisë ka mbërritur menjëherë në
Tiranë. Komisioni Evropian i shprehu ngushëllimet kryeministrit Sali Berisha. Nga
Italia ka mbërritur në mbrëmje në Tiranë një ekip mjekësh i Mbrojtjes Civile. Forcat
e xhenios dhe të RENEA-s ndodhen në zonë për të stabilizuar gjendjen dhe për të gjetur
personat që nuk dalin dot nga shtëpitë, apo që janë fshehur në tunelet e ushtrisë,
që ndodhen jo larg fabrikës. Kjo e fundit është rrafshuar krejtësisht. Presidenti
i Dhomës italiane të Deputetëve, Fausto Bertninotti, pasi mori vesh lajmin dha një
deklaratë, që vlen si reflektim për të gjithë. “Ka tragjedi në botën e sotme
që e bëjnë të heshtin politikën dhe njerëzit. Vështirë të thuhet diçka e pranueshme
dhe e arësyeshme para një tragjedie si kjo, por ajo na detyron të ngremë pikëpyetje
mbi botën në të cilën jetojmë. Së paku kjo është një detyrë njerëzore, para se të
jetë edhe politike”.