Atentat i dyfishtë në Pakistan. Përfshihen edhe institucione të Kishës Katolike.

(11.03.2008 RV)Gjendje alarmi në Pakistan, ku dy atentate kamikaze në qytetin e Lahores shkaktuan mëse 25 viktima e rreth 175 të plagosur. Të goditura nga shpërthimi Agjensia Federale për Hetimet dhe një agjensi reklamash, por edhe një kishë katolike, një kuvend, një shkollë dhe zyrat e Karitasit lokal. Menjëherë, presidenti i Pakistanit, Pervez Musharraf dënoi ashpër aktin.
Në planin politik, Musharraf ka thirrur për në 17 mars mbledhjen e Parlamentit të ri, dalë nga zgjedhjet e 18 shkurtit. Dy partitë e opozitës që fituan janë marrë vesh për krijimin e qeverisë së koalicionit.

Konfirmimi i parë zyrtar nga ana e Hamasit për ekzistencën e një marrëveshjeje armëpushimi me izraelitët në Rripin e Gazës. Me ndërmjetësinë e egjiptianëve, është arritur armëpushimi, që tashmë ka hyrë në ditën e tij të tretë. Gjithsesi, mbetet kritike gjendja në zonë, pas deklaratës së kryeministrit izraelit Ehud Olmert për shtrirjen e një kolonie ultraortodokse hebre në Çisjordani. Një plan që është kritikuar ashpër nga OKB-ja, nga Bashkimi Evropian dhe SHBA-të. Ndërkaq, burime palestineze, dënuan iniciativat izraelite, por shprehën edhe gatishmërinë për të rifilluar negociatat për paqen, të ndërprera pas ndeshjeve të përgjakshme në Gaza.