Në Engjëllin e Tënzot, Benedikti XVI bëri thirrje kundër dhunës në Tokën Shenjte e
në Irak; kërkoi lirimin e ipeshkvit irakian Rahho dhe i ftoi të rinjtë në DBR.
(10.03.2008 RV)Paqe e solidaritet
për Tokën Shenjte, në vend të dhunës e tmerrit. Shqetësim i thellë për fatin e kryeipeshkvit
kalde, imzot Rahhos dhe për irakianët që vijojnë të jenë viktima të një dhune të verbër
e të pakuptim. Kjo ishte thirrja e dyfishtë e Benediktit XVI, në përfundim të lutjes
së Engjëllit të Tënzot, kremtuar dje në mesditë në Sheshin e Shën Pjetrit. Pak para
lutjes, Papa, i frymëzuar nga Ungjilli i së Dielës së pestë të Krezhmëve, që flet
për ringjalljen e Lazrit, pohoi se sipas fesë, vdekja e korpit është rënie në gjumë,
nga i cili Zoti mund të na zgjojë në çdo çast”. Ndërsa pas thirrjeve për Tokën Shenjte
dhe Irakun, Benedikti XVI i ftoi të rinjtë në Liturgjinë pendestare, në Bazilikën
e Shën Pjetrit, të enjten e ardhshme, kremtim ky përgatitor për Ditën Botërore të
Rinisë të Sidneit. “Në ditët e kaluara, dhuna e tmerri e gjakosën përsëri Tokën
Shenjte, duke ushqyer spiralen e shkatërrimit e të vdekjes, që duket e pafundme. Ndërsa
ju ftoj t’i luteni me ngulm Zotit të Gjithëpushtetshëm për dhuratën e paqes në këtë
zonë, dëshiroj t’ia besoj mëshirës së Tij viktimat e shumta të pafajshme dhe t’u shpreh
solidaritetin tim familjeve të të plagosurve”. Lutja e Engjëllit të Tënzot,
e cila fliste për ringjallje e besim në Krishtin, dhurues i jetës, i kujtoi Benediktit
XVI, menjëherë pas lutjes mariane, barbaritë e përgjakshme që u rikthyen, për të tronditur
përsëri rëndë shpresat për paqe në Lindjen e Mesme: “Inkurajoj autoritetet izraelite
e palestineze të vijojnë përpjekjet për ndërtimin, përmes bisedimeve, të ardhmërisë
paqësore e të drejtë të popujve të tyre dhe të gjithëve u lutem, në emër të Zotit,
të largohen nga udha e urrejtjes dhe e hakmarrjes e të ecin, me përgjegjësi, në rrugën
e dialogut e të besimit”. E më pas, Benedikti XVI kujtoi skenën e Irakut, ku
luhet një dramë tjetër, e ngarkuar me tension e ankth: “Këtë uroj edhe për Irakun,
ndërsa dridhemi akoma për fatin e Shkelqësisë së Tij, Imzot Rahhos e të shumë irakianëve,
që vijojnë të jenë viktima të dhunës së verbër e absurde, e cila sigurisht është krejt
në kundërshtim me vullnetin e Zotit”. Para se të shprehte shqetësimet e tij
e të lutej për përfundmin pozitiv të dramave në vendet e Lindjes së Mesme, Benedikti
XVI foli për jetën e vdekjen, fenë e shpresën, duke ndjekur fillin e Ungjillit, që
na tregon ringjalljen e Lazrit. Rikthimi i tij në jetë – tha Papa - në një farë mënyre
duhet parë si paralajmërim i vdekjes për Jezusin. Me këtë mrekulli të madhe e të fundme
– ringjalljen publike të vëllaut të Martës e të Marisë - Krishti u jep Kryepriftërinjve
të Sinedrit dhe skribëve (shkronjësve) ‘provën e gjallë të hyjnisë së tij’: është
pikërisht mrekullia ajo që i tërbon e i shtyn të mendojnë për ta mbytur Nazarenin.
Por episodi përmban edhe vlerat e mëdha humane: miqësinë, mëshirën e dhimbjen për
vdekjen e njeriut të dashur, vetë thelbin e misionit tokësor të Jezusit: fitoren e
Hyjit mbi vdekjen. “Mikun tonë, Lazrin, e ka zënë gjumi; po shkoj ta zgjoj” u thotë
Jezusi nxënësve të vet tejet të habitur. Hyji – pohoi Papa - e shikon vdekjen fizike
si gjumë, nga i cili mund të na rizgjojë. “Ky sundim mbi vdekjen, nuk e pengoi
Jezusin të provonte dhimbje për ndarjen nga njeriu i dashur. Duke parë lotët e Martës,
të Marisë e të atyre që kishin shkuar për kryeshëndosh, edhe Jezusi u prek thellë
në shpirt, u turbullua e më në fund, shpërtheu edhe ai në vaj. Zemra e Jezusit është
hyjnore-njerëzore: në Të Hyji e njeriu takohen përsosurisht, pa ndarje, pa pështjellim.
Ai është shembëllimi, madje, mishërimi i Hyjit, që është dashuri, mëshirë, dhëmbshuri
atërore e amtare, jetë”. Edhe Marta, motra e Lazrit, në një farë mënyre shprehu
pakënaqësinë për arritjen me vonesë të Jezusit. Por pati privilegjin të dëgjonte,
nga goja e vetë Mësuesit, pohimin, që është zemra e mesazhit të krishterë: “Unë jam
Ringjallja dhe Jeta; kush beson në mua, edhe në se vdes, do të jetojë; kush jeton
e beson në mua, nuk do të vdesë në amshim”. E të njëjtën pyetje, që ia bëri Martës
më pas: “A e beson ti këtë?”, Krishti ia bën prej dynmijë vjetësh secilit nga ne –
ripohoi Papa dhe vijoi: “Një pyetje që e kapërcen aftësinë tonë për të kuptuar
e që na fton t’ ia besojmë veten atij, ashtu si ia besoi ai Atit. Shembullore përgjigjja
e Martës: “Po Zotëri! Unë besoj se ti je Mesia, Biri i Hyjit – ai që duhet të vijë
në botë”. Po, o Zot! Edhe ne besojmë, megjithë dyshimet tona e paqartësitë tona; besojmë
në Ty, sepse ti ke fjalët e jetës së pasosur; duam të besojmë në Ty, që na dhuron
shpresën e sigurtë të jetës së përtejme, jetës së vërtetë e të plotë në mbretërinë
tënde të dritës e të paqes”. Kur Benedikti XVI – gjatë përshëndetjeve pas Engjëllit
të Tënzot, i ftoi të rinjtë e dioqezës së Romës në Liturgjinë pendestare, që do ta
kryesojë të enjten, më 13 mars, në Bazilikën e Shën Pjetrit, turma poshtë dritares
së Papës u përgjigj me një duartrokitje e stuhishme: “Do të jetë një çast i
fortë i përgatitjes për Ditën XXIII Botërore të Rinisë, që do ta kremtojmë të Dielën
e Larit e që do të arrijë kulmin në korrikun e ardhshëm, me takimin e madh të Sidneit.
Të dashur të rinjt të Romës, ju ftoj të gjithë në këtë takim me mëshirën e Zotit!”.