Benedikti XVI kryesoi Meshën Shenjte në kishën e Shën Lorencit
(09.03.2008 RV)Sot Papa e tha lutjen e Engjëllit të Tënzot, pasi kishte kremtuar
Meshën Shenjte për veprimtarët e Qendrës Ndërkombëtare Rinore të Shën Lorencit.Ati
i Shenjtë shkoi në Kishën romake të Shën Lorencit in Piscibus me rastin e 25- vjetorit
të themelimit të kësaj qendre nga Papa Gjon Pali II, që e pati quajtur ‘farkë e të
rinjve të krishterë’. Kisha që ndodhet pranë sallës së Qendrës, afër Bazilikës së
Shën Pjetrit, është seli e Kryqit, që Papa Vojtila ua dorëzoi mbarë të rinjve të botës
në përfundim të Vitit Shenjt të Shëlbimit. E pikërisht nën shenjën e këtij kryqi,
i njëjti që shoqëron Ditët Botërore të Rinisë, takohen vazhdimisht të rinjtë për çaste
lutjeje, ballafaqime ndërmjet shtegtarëve të rinj, studim, takime të të rinjve që
jetojnë larg nga shtëpitë e tyre. Prandaj qendra i ka portat e hapura çdo ditë nga
ora 11.00 deri në orën 17,00, ndërsa çdo të premte, në orën 18. 30, këtu kremtohet
Mesha ndërkombëtare, e pasur me çaste reflektimi. Tashmë qendra njihet me emrin: “shtëpia
e të rinjve pranë Papës”. Kështu mund të themi se sot Benedikti XVI ishte në shtëpinë
e vet.