Nikaragua ndërpret marrëdhëniet diplomatike me Kolumbinë
(07.03.2008 RV)Nikaragua ndërpret marrëdhëniet diplomatike me Kolumbinë, duke
i dhënë edhe më tepër krizës se Andeve, siç quhet tashmë, një përmasë të pajustifikuar
rajonale. Kujtojmë se problemet ndërmjet Kolumbisë, Ekuadorit, Venezuelës, e tani
së fundi edhe Nikaraguas, lindën pas sulmit të një njësiti ushtarak kolumbian në territorin
ekuadorian, gjatë të cilit u vra numri 2 i Forcave të armatosura revolucionare kolumbiane,
FARC. Fatkeqësisht, akoma nuk është hapur asnjë spirale dialogu, pavarësisht nga thirrja
e ipeshkvijve për të ulur tonin e polemikës dhe për të shfrytëzuar çdo mundësi që
krerët e shteteve të përfshira të flasin drejtpërdrejt. Në dokumentin e sotëm të presidentëve
të 22 Konferencave Ipeshkvnore latinoamerikane, të mobilizuar për zgjidhjen e krizës,
thuhet se “të kërkosh paqen është një detyrë themelore për çdo qeveri të përgjegjshme
dhe, njëkohësisht, një nevojë e pazëvendësueshme për jetën dhe zhvillimin e plotë
të vendeve”.