Gjendje alarmi në Jeruzalem pas sulmit në kolegjin e rabinëve
(07.03.2008 RV)Tension i lartë në Jeruzalem pas vrasjes së tetë studentëve
të shkollës së rabinëve nga një atentator palestinez. Sot paradite u zhvillua funerali
i të rinjve, pesë prej të cilëve nuk kishin mbushur akoma 18 vjeç e njëri ishte madje
15. Policia është në gjendje alarmi e krejt Qyteti i Shenjtë mbahet nën kontroll të
rreptë. Kalimet me Çisjordaninë janë mbyllur për motive sigurie. Në Jeruzalemin lindor
janë arrestuar mëse dhjetë persona. Për rëndimin e situatës në Lindjen e Mesme do
të diskutojnë të hënën ministrat e jashtëm të Bashkimit Evropian, që kanë dënuar ashpër
këtë “sulm të pamëshirshëm terrorist”. Ndërkaq, Këshilli i Sigurimit i OKB-së, që
u mblodh urgjentisht mbrëmë, nuk arriti të gjejë një konsensus për të dënuar atentatin
në Jeruzalem. Sipas SHBA-ve dhe Izraelit, shkaktare për këtë bllokim ishte Libia.
U
rrit në së paku 68 viktima e mëse 150 të plagosur bilanci i atentatit të djeshëm të
dyfishtë në lagjen Karada të Bagdadit. Më në veri, në Mosul, pas shpërthimit të një
autobombe në afërsi të kazermës së policisë, dy bomba shpërthyen sot paradite në qendër
të qytetit. Së paku 4 vetë kanë humbur jetën.
Kenia do të ketë një qeveri
të re brenda dy ose tre javësh. Kështu ka deklaruar kreu i opozitës, Raila Odinga
për BBC-në, pas pohimeve të djeshme optimiste të presidentit Kibaki. Parashikohet
që posti i kryeministrit t’i jepet Odingës, por akoma duhen përcaktuar struktura dhe
programi i qeverisjes. Përparësitë e qeverisë së re do të jenë të zhvendosurit, kujdesi
për të plagosurit dhe rindërtimi i vendit. Që nga fundi i dhjetorit, kur filluan ndeshjet,
konflikti ndërmjet pozitës dhe opozitës ka shkaktuar 1500 të vrarë e rreth 300 mijë
të shpërngulur.
Sesioni i parë i Asamblesë Kombëtare pakistaneze do të
mbahet brenda dy javësh. Deklarata është e vetë presidentit Musharraf, i cili të paktën
në dukje, ka pranuar fitoren e opozitës në zgjedhjet legjislative të 28 shkurtit.
Dy partitë e opozitës duhet të krijojnë tani koalicionin për qeverisjen e vendit.