Kardinali Bertone në Armeni i çoi Patrikut Karekin II, përqafimin vëllazëror të Papës
dhe urimin për paqe.
(05.02.2008 RV)Një përqafim vëllazëror dhe urimin për paqe: kardinali Bertone,
sekretar i Shtetit të Vatikanit, që arriti dje në Republikën armene me ftesën e autoriteteve
fetare e civile, i dorëzoi Patrikut e Katolikosit të të gjithë armenëve, Karekini
II, letrën autografe të Benediktit XVI. Hirësia e Tij i shprehu Katolikosit admirimin
e Benediktit XVI për thesarin kulturor e shpirtëror që i kanë dhuruar armenët njerëzimit
dhe uroi që populli i Armenisë t’i kapërcejë sa më shpejt vështirësitë shoqërore në
të cilat jeton e të sigurojë një të ardhme me drejtësi, besim e transparencë për të
gjithë kombin. Papa është i vetëdijshëm – nënvizoi sekretari i Shtetit të Vatikanit
– për rolin parësor e të pazëvendësueshëm që do të luajë Kisha në këtë proces. Kardinali
Bertone kujtoi se në të kaluarën pushteti ateist bëri çmos ta dobësojë Kishën armene,
shumë bij të së cilës, ipeshkvij, meshtarë e laikë, derdhën gjakun për Krishtin. Kujtim
tepër i freskët, sepse ky gjak u derdh vetëm pak vite më parë. Më pas lavdëroi impenjimin
e palodhshëm të Patrikut Karekin II për rindërtimin e Kishës së ligështuar nga regjimi
sovjetik. Dje sekretari i Shtetit të Vatikanit u takua edhe me kryeministrin
Serge Sarkisian. Ndërsa sot paradite, pas bisedimeve me ministrin e jashtëm,
kardinali Bertone pati tre takime: vizitoi Panikun, ku pushon në paqe atë Komitas,
meshtari i parë i ardhur në Armeni pas komunizmit; më pas, Giumrin, ku shkoi në Ordinariatin
katolik dhe në jetimoren e motrave armene të Zojës së Papërlyer dhe, së fundi, spitalin
armen të Ashotzkut, pranë Gjeorgjisë, ndërtuar me dëshirën e Gjon Palit II pas tërmetit
që e tronditi tmerrësisht këtë vend 20 vjet më parë, duke shkaktuar 30 mijë të vdekur.
Kardinali falënderoi Kamilianët dhe Motrat e Vogla të Krishtit, që punuan këtu edhe
në vitet e komunizmit, në izolim të plotë e në kushte tepër të vështira klimaterike.
Pastaj iu drejtua mjekëve, duke i ftuar ta mbrojnë jetën me çdo mjet e në çdo fazë
të zhvillimit të saj e duke u kujtuar se ‘të mjekosh nuk është zanat, por mision,
të cilin të gjithë duhet ta ushtrojnë me besnikëri të plotë’.Së fundi, foli fjalë
ngushëllimi edhe për të sëmurët. “Kisha – u tha kardinali Bertone – dëshiron t’i lehtësojë
vuajtjet e të sëmurëve, duke ia kushtuar Zotit duart, mendjen e zemrën”.