(02.03.2008 RV)Sot Kisha katolike
kremtoi të Dielën e katërt të Kohës së Krezhmëve. U përkujtua edhe Shën Angjela e
Kryqit.
Nesër, e hënë, është festa e Shën Kunegundës dhe e Enrikut
II perandor. Liturgjia e festës na kujton se të besosh, duke e lëshuar plotësisht
veten në dorën e Zotit, është kushti i parë që duhet plotësuar, në se duam të realizohen
që në këtë tokë qiejtë e rinj e toka e re, premtuar nga Hyji.
“Dëshiron
të shërohesh?”. – Këtë pyetje Jezusi ia bën çdo njeriu, që është i paralizuar në shumë
drejtime, që përpiqet t’i kapërcejë kufizimet, të cilat e pengojnë në çdo hap e ta
ndjejë praninë e Zotit. E këtë na e kujton edhe liturgjia në festën e Shën Kazimirit,
Pajtor i Lituanisë dhe të Shën Umbertit III të Savojës, që do të përkujtohen të
martën. Të mos harrojmë: Krishti pret përgjigje!
Shën Luçiani dhe Shën
Adriani, të cilët Kisha do t’i festojë të mërkurën, na kujtojnë se Ati qiellor
nuk harron asnjeri, përkundrazi, është gati t’u japë të gjithëve jetën e amshuar,
duke kërkuar prej tyre një gjë të vetme: T’i binden fjalës së tij dhe të besojnë në
Atë që ka dërguar”.
Të besosh në Hyjin, nuk është thjeshtë diçka që lidhet
me praktikimin e fesë ose me njohjen intelektuale të saj. T’i besosh Hyjit, do të
thotë ta ndjesh veten të varur prej Tij, me bindjen se Ai është burimi i të gjitha
sendeve që na duhen për jetën tokësore e edhe për mbretërinë qiellore, ku secili synon
të arrijë një ditë. Këtë na e kujton liturgjia e festës së Shën Rozës nga Viterbo,
që do të kremtohet të enjten.
Jezusin nuk e dënuan
vetëm krerët e priftërinjtë, por edhe secili nga ne, sepse duke mëkatuar, nuk e jetojmë
çdo ditë, pa u lodhur kurrë, mesazhin ungjillor. Na e kujton këtë festa eShenjtoreve
Perpetua e Feliçita, që do të kremtohen të premten.
Shën Gjoni i
Zotit, themelues i Fatebenefratelli, pajtor i të sëmurëve dhe i punonjësve të spitaleve,
që do të kremtohet të shtunën, na kujton pyetjen e Jeremisë profet: “Sa duhet
e sa mund të vuajmë për Zotin?”, e sidomos, përgjigjen që i dha Krishti, duke vuajtur
deri në vdekje, deri në kryq!
E diela e ardhshme është e pesta dhe e fundit
e Krezhmëve: i paraprin të Dielës së Larit.