Papa në audiencën me ipeshkvijtë e Salvadorit: “Të luftohet kundër dhunës, për kulturën
e paqes”.
(28.02.2008 RV)“Mbrojtja e familjes,
lufta kundër varfërisë, edukimi i breznive të reja”: këto janë tri temat kryesore
që preku Benedikti XVI në audiencën me ipeshkvijtë e Salvadorit, të cilët i priti
sot paradite në Vatikan, me rastin e vizitës së tyre ‘ad Limina’ – ‘te Varret e Apostujve’.
Papa pohoi se nga njëra anë u duhen krijuar të gjithëve kushtet për ta jetuar jetën
me dinjitet, ndërsa nga ana tjetër, njeriu nuk mund e nuk duhet të bëhet thjeshtë
prodhim i shoqërisë, në të cilën jeton. A causa de la situación de pobreza… Për
shkak të varfërisë - kujtoi me hidhërim Ati i Shenjtë - shumë salvadorianë detyrohen
të mërgojnë, në kërkim të një jete më të mirë. Ky fenomen ka shumë pasoja negative,
sepse shkakton paqëndrueshmërinë e martesës dhe shpërbërjen e familjes. Papa kujtoi
me kënaqësi përpjekjet e mëdha të prelatëve për të siguruar paqen e pajtimin në vend,
duke kapërcyer, kështu, kundërvëniet e dhimbshme të së kaluarës. Benedikti XVI foli
edhe për plagën e përdorimit të dhunës, që është shumë e përhapur në vendin qëndroamerikan.
Duke analizuar shkaqet, vërejti se shtimi i rasteve të përdorimit të dhunës është
pasojë e plagëve, akoma më të thella, si varfëria, mungesa e edukimit, shpërbërja
e familjes, humbja e vazhdueshme e vlerave, që kanë qenë gjithnjë shpirti i popullit
të këtij vendi. Frente a la pobreza de tantas personas… Përballë varfërisë
së shumë njerëzve - theksoi me forcë Papa – është e domosdoshme të përmirësohen strukturat
dhe kushtet e jetesës, duke u krijuar të gjithëve mundësitë të jetojnë denjësisht,
pa harruar se njeriu nuk është thjeshtë prodhim i kushteve materiale e shoqërore në
të cilat jeton. Ka nevojë për diçka më shumë, dëshiron diçka më tepër, se mund t’i
japë shkenca ose çfarëdolloj nisme njerëzore. Los hombres anhelan a Dios en
lo más íntimo de su corazón… Njerëzit – tha Papa - kanë etje për Hyjin në thellësi
të zemrave të tyre. VetëmAi mund t’ua shuajë etjen për një jetë të vërtetë,
sepse vetëm në Të mund të gjejnë dashurinë e pakushtëzuar, që është më e fortë se
vdekja!Kujtojmë se, në emër të ipeshkvijve të Salvadorit, Papën e përshëndeti imzot
Fernando Sáez Lavale, kryetar i episkoptatit salvadoarian.