Medvedev akuzon SHBA-të se me Kosovën sjellin paqëndrueshmëri në Evropë
(27.02.2008 RV)Rusia vazhdon të
akuzojë SHBA-të për çështjen e Kosovës. Sipas favoritit për presedencën ruse, Dmitrij
Medvedev, Uashingtoni, duke njohur e mbështetur pavarësinë e Kosovës, nxit krijimin
e situatave të paqëndrueshme në Evropë. Medvedev mendon se kontinenti i vjetër është
në një pozitë shumë të vështirë, para një Amerike që duke qenë larg gjeografikisht,
nuk i interesojnë shumë konfliktet që mund të zgjohen në brendësi të Evropës. Akuzës
i përgjigjet zëdhënësi i Departamentit amerikan të shtetit, Tom Kejsi, për të cilin,
SHBA-të do të vazhdojnë dialogun me Rusinë, pavarësisht nga këndvështrimet e ndryshme
për Kosovën. Por ajo që kërkojnë amerikanët, është respekti i anasjelltë, pa dhunë
e kërcënime. Nga ana tjetër, përfaqësuesi amerikan në bisedimet për statusin e Kosovës,
Frenk Uizner, duke folur në Institutin Amerikan të Paqes sqaroi një herë e përgjithmonë
se as SHBA-të, as Evropa nuk kanë ndërmend të anullojnë vendimin për njohjen e pavarësisë
së Kosovës.
Gara ndërmjet kandidatëve demokratë për presidencën e SHBA-ve
përfshin edhe çështjen e Kosovës. Për të u fol në debatin televiziv ndërmjet senatorëve
Hilari Klinton dhe Barak Obama, para votimeve në dy shtete kyçe, Ohajo dhe Teksas.
Si Obama, i cili tashmë gëzon një popullaritet shumë më të madh se gruaja e ish-presidentit
Klinton, ashtu edhe kjo e fundit mbështetën ndërhyrjen amerikane në Kosovë dhe shpalljen
e pavarësisë së saj. Obama, duke kritikuar politikën e presidentit aktual Bush ndaj
Rusisë, sidomos në fushën e mbrojtjes së të drejtave të njeriut, theksoi se në rast
se Moska do të kërcënojë shtetin e ri të pavarur, ai do të bashkëpunojë fuqimisht
me bashkësinë ndërkombëtare për të mbrojtur Prishtinën.