(24.02.2008 RV)Sot Kisha katolike
kremtoi të Dielën e tretë të Kohës së Krezhmëve. U përkujtuan edhe Eveci e Pjetri,
martirë .
Nesër, e hënë, është festa e Shën Nestorit, ipeshkëv i Magjidos
e martir. Liturgjia e festës së martirit na kujton se për t’u shëruar nga sëmundjet
tona shpirtërore, duhet të heqim dorë nga mendjemadhësia, e të bëhemi të përvujtë,
si Naamani, duke ia besuar gjithçka vullnetit të Hyjit.
Në se dëshiron të
provosh faljen e mëshirën e Zotit, fale edhe ti të afërmin tënd, e do të ndjesh kënaqësinë
e pafund të ndjesës hyjnore – na kujton liturgjia në festën e Shën Aleksandrit
e të Shën Faustianit, ipeshkëv i Bolonjës, që do të përkujtohen të martën.
Shën Gabrieli i Zojës së Dhimbëshme, klerik pasionist, të cilin Kisha do ta
festojë të mërkurën, na kujton se dhjetë urdhërimet, që duhet t’i respektojë
i krishteri, nisin me emrin e Tënzot, me ftesën për ta dëgjuar Fjalën e tij. E është
pikërisht dëgjimi dhe vënia në jetë e fjalës së Zotit, ajo që e dallon të krishterin
e vërtetë.
Në se duam t’i tregojmë botës se i përkasim Krishtit, duhet ta
dëgjojmë Fjalën e Hyjit dhe ta zbatojmë në jetën tonë. Vetëm kështu njerëzit mund
të binden se jemi të krishterë jo me fjalë boshe, me predikime të zbrazta, nga të
cilat bota është e velur, por me vepra. Këtë na e kujton liturgjia e festës së Shën
Romanit abat dhe Shën Osvaldit, që do të kremtohen të enjten.
Në
festën e Shën Justinit e të Shën Hilarit, papë, të premten e ardhshme, përmes
leximeve liturgjike, Profeti Oze na fton të bëjmë kthesë, të pendohemi e të largohemi
nga idhujt që i kemi krijuar vetë në jetën tonë. Jezusi na tregon rrugën që duhet
të ndjekim: të duam mbi gjithçka Hyjin e vëllezërit.
Shën Feliçi III papë
e Shën Albini, ipeshkëv i Anzherit, që do të kremtohen të shtunën, na kujtojnë
se jemi mësuar aq shumë të paraqitemi para të tjerëve me maska, sa rrezikohemi të
fshehim pas tyre fytyrën tonë të vërtetë edhe atëhere kur lutemi, duke harruar se
Zoti sheh përtej maskave e se na njeh ashtu si jemi vërtetë.
E diela e ardhshme
është e katërta dhe e parafundit e Krezhmëve: vetëm dy javë na ndajnë nga Pashkët
e ngjalljes: të shpejtojmë hapat!