Papa rrethit të Shën Pjetrit: ‘Kush vuan së bashku me nevojtarët, bëhet lajmëtar e
dëshmitar i Ungjillit të dashurisë”.
(22.02.2008 RV)Sot paradite, duke
pritur në audiencë një delegacion të Rrethit të Shën Pjetrit, Benedikti XVI i shprehu
mirënjohjen e tij për veprat e bamirësisë e të asistencës të të sëmurëve. Hyji – tha
Papa - na fton ta shprehim fenë e dashurinë që ushqejmë për të, duke u treguar të
vemendshëm ndaj njerëzve që takojmë, posaçërisht ndaj atyre që kalojnë çaste prove,
me vetëdijen se në fytyrën e çdo njeriu, aq më tepër kur është nevojtar, shndrit fytyra
e vetë Krishtit. Dëshmia e vlerave të fesë së krishterë, bamirësia ndaj të varfërve
dhe shërbimi ndaj të sëmurëve kanë qenë gjithnjë në qendër të vëmendjes në veprimtarinë
e veprës Rrethi i Shën Pjetrit, themeluar 139 vjet më parë. E, në ditën kur Kisha
kremton festën e Katedrës së Shën Pjetrit, me të cilën falënderon Hyjin për misionin
që ua besoi apostullit e pasardhësve të tij, Benedikti XVI theksoi përpjekjet që bën
Rrethi, në emër të Papës, për t’iu përgjigjur nevojave të të varfërve që jetojnë në
Romë: “Ju dëshironi të jeni krahët e tij e zemra e tij, që arrijnë, edhe përmes
jush, tek ata, të cilët jetojnë në mjerim. Dhe e di se në vitet e fundit i keni shumfishuar
përpjekjet, për t’iu përgjigjur me nisma bamirësie bujare e impenjative, kërkesave
të këtyre njerëzve, që kalojnë çaste të vështira”.Ati i Shenjtë e falënderoi delegacionin
e Rrethit për dorëzimin e lëmoshës, që njihet me emrin ‘Oboli i Shën Pjetrit’, një
ndihmë konkrete për Papën, që të mund t’u përgjigjet kërkesave të shumta nga të katër
anët e botës.