Jeremiç në Europarlament: "Kosova do të mbetet pjesë e Serbisë"
(20.02.2008 RV)Ndërkaq, menjëherë pas ipeshkvit të Kosovës, imzot Dodë Gjergjit,
Europarlamenti dëgjoi sot edhe ministrin e jashtëm serb, Vuk Jeremiç, i cili po sot,
foli edhe para Këshillit të Evropës. “Kosova do të mbetet gjithnjë pjesë e Serbisë”
– deklaroi ai në Strasburg, pasi shpjegoi se Beogradi është gati të riulet në tryezën
e bisedimeve me Prishtinën, për të përcaktuar statusin e Kosovës, atë status që do
të njihej edhe nga Serbia. Jeremiç u shpreh si europeist i bindur, megjithëse në këtë
moment i vjen turp për të gjitha ato shtete që kanë tradhëtuar Beogradin duke njohur
pavarësinë e Kosovës. Gjithashtu, Jeremiç, duke iu referuar dhunës së djeshme në kufi,
e dënoi atë ashpër, por nënvizoi se në të gjithë Serbinë njerëzit ndjehen të zhgënjyer
nga situata.