Benedikti XVI në Engjëllin e Tënzot: ta dëgjojmë e ta ndjekim Jezusin në udhën e Kryqit,
për të hyrë në jetën e pasosur.
(18.02.2008 RV)Për të hyrë në jetën e pasosur duhet ta dëgjojmë Jezusin, ta
ndjekim në udhën e Kryqit, duke pasur në zemër, ashtu si ai, shpresën e ringjalljes.
Këtë theksoi dje, gjatë lutjes së Engjëllit të Tënzot, kremtuar në Sheshin e Shën
Pjetrit, Benedikti XVI i cili, të shtunën e kaluar, përfundoi në Vatikan javën e Ushtrimeve
shpirtërore për Kohën e Krezhmëve, me pjesëmarrjen edhe të Kuries Romake. Në shesh
ishin të pranishëm mijëra besimtarë, ardhur nga mbarë bota për lutjen mariane, në
një ditë të acartë dimërore, ndonëse plot diell. Papa bëri thirrje për pajtimin në
Liban, vend i cili që prej tre muajsh nuk arrin dot të zgjedhë kryetarin e shtetit. Duke
pasur parasysh leximet biblike, Ati i Shenjtë lidhi Ungjillin e së dielës së parë
të Krezhmëve, që flet për tundimet e Jezusit, me Shndërrimin e Krishtit mbi mal,
të ungjillit të djeshëm, episode në të cilat ndjehet fuqimisht misteri i Pashkëve: “Lufta
e Jezusit me tunduesin i paraprin duelit përfundimtar të Mundimeve, ndërsa drita e
korpit të tij të shndërruar përshpejton lumninë e Ngjalljes. Nga njëra anë shikojmë
Jezusin plotësisht njeri, që pëson edhe tundimin, si na; nga ana tjetër, kundrojmë
Birin e Hyjit, që e hyjnizon natyrën tonë njerëzore. Mund të themi kështu se këto
dy të diela janë si dy shtylla, mbi të cilat mbështetet gjithë ngrehina e jetës së
krishterë, thelbi i së cilës është dinamizmi i Pashkëve, kalimi nga vdekja në jetë”.
Mali – Tabori, ashtu si Sinai – nënvizoi Papa – është vendi në të cilin njeriu
e ndjen veten shumë më pranë Zotit, sesa në jetën e përditshme. Është maje mali, ku
mund të thithësh ajrin e pastër të krijimit: “Shndërrimi është ngjarje që lidhet
ngushtë me lutjen: duke u lutur, Jezusi shkrihet në Hyjin, bëhet një me Të, bashkon
vullnetin e tij njerëzor me vullnetin e dashurisë së Atit, e kështu pushtohet nga
drita e duket ai që është në të vërtetë: “Ai është Hy, Dritë prej Drite”. Veshja
e bardhë e flakëruese e Jezusit, na kujton rilindjen në pagëzim, parashijim i jetës
qiellore: “Kjo është pika vendimtare: shndërrimi është përshpejtim i ngjalljes,
por kjo të kujton vdekjen. Jezusi u tregon Apostujve lumninë e tij, që të kenë forcë
për ta përballuar shkandullin e Kryqit e të kuptojnë se duhet të durojnë shumë mundime
për të hyrë në Mbretërinë e Hyjit”. Papa kujtoi, më pas, zërin e Atit, që jehon
nga lart, duke shpallur se Jezusi është Biri i tij i dashur e duke shtuar: “Dëgjojeni!”: “Për
të hyrë në jetën e amshuar duhet dëgjuar Jezusi, duhet ndjekur në udhën e kryqit,
duke pasur në zemër, ashtu si Ai, shpresën e ringjalljes. “Spe salvi’, ‘të shpëtuar
nga shpresa”. E sot mund të themi: “Të Shndërruar nga shpresa”. Pas lutjes
së Engjëllit të Tënzot, Benedikti XVI shprehu shqetësimin e tij për situatën e tensionuar
në Liban, vend i cili që prej tre muajsh nuk ia del mbanesh të ketë një kryetar shteti.
Përpjekjet për të dalë nga kriza dhe ndihma që kanë ofruar përfaqësues të rëndësishëm
të bashkësisë ndërkombëtare – nënvizoi Papa – ndonëse nuk është arritur akoma asnjë
rezultat, tregojnë se nuk mungojnë përpjekjet për të gjetur një president, që të
jetë i tillë për të gjithë libanezët e për t’i kapërcyer përçarjet e sotme: “Për
fat të keq, nuk mungojnë as arsyet që të shtyjnë të shqetësohesh, posaçërisht për
shkak të dhunës, e cila ushtrohet jo vetëm me fjalë, por edhe me qëndrimin e atyre
të cilët e mbështesin gjithë shpresën në forcën e armëve e në zhdukjen fizike të kundështarëve.
Së bashku me Patrikun maronit dhe të gjithë ipeshkvijtë libanezë, ju ftoj të bashkoni
zërin në lutjen time drejtuar Zojës së Libanit, që t’i inkurajojë nënshtetasit e
këtij kombi të dashur, e në mënyrë të posaçme politikanët, të punojnë me guxim për
pajtimin, dialogun e sinqertë, bashkëjetesën paqësore e për të mirën e një atdheu,
që u takon njëlloj të gjithëve”. Më pas, gjatë përshëndetjeve përfundimtare
në gjuhë të ndryshme, Papa i nxiti të gjithë besimtarët ta jetojnë Kohën e Krezhmëve
me përshpirtëri të posaçme, duke agjëruar, a më mirë të themi, duke qëndruar larg
figurave e zhurmave të botës e pranë njerëzve nevojtarë, duke dhënë lëmoshë e duke
kryer vepra dashurie të krishterë.