Kosova shpall pavarësinë. Shqiptarët kudo në festë.
(17.02.2008 RV)Kosova shpall pavarësinë dhe miraton simbolet e shtetit më të
ri të botës. "Ne e shpallim Kosovën republikë demokratike dhe laike. …Kosova
e pavarur do të jetë e përkushtuar ndaj paqes dhe stabilitetit. …Me pavarësinë, Kosova
i merr përsipër përgjegjësitë ndërkombëtare, i garanton kufijtë e fqinjëve të saj
dhe përmbahet nga dhuna si mjet për zgjidhjen e mosmarrëveshjeve. Kosova e deklaron
vullnetin e saj për marrëdhënie të mira me fqinjët”. Këto ishin fjalët e shqiptuara
sot në orën 15.50 nga kryeministri i Kosovës, Hashim Thaçi para një parlamenti të
mbledhur në seancë të jashtëzakonshme, që duartrokiti stuhishëm. Ndërkaq në shesh,
mijëra e mijëra shqiptarë të Prishtinës, por edhe të ardhura nga vise të tjera të
Kosovës e të trojeve të tjera ku banojnë shqiptarë, festonin me këngë e me valle realizimin
e ëndrrës shumëvjeçare të popullsisë kosovare. Flamujt shqiptarë kuq e zi valëvisnin
në të gjitha sheshet e për momentin, akoma nuk duket flamuri i ri i miratuar nga parlamenti,
me hartën ngjyrë ari të Kosovës në fushën blu, me 6 yje të bardhë sipër. Por për ngjarjet
e fundit në vend, të dëgjojmë informacionin e Lekë Musollit nga Prishtina