Magjisteri i Benediktit XVI në qendër të takimit të organizuar nga Radio Vatikani
me imzot Fizikelën.
(15.02.2008 RV)Dje paradite, gjatë një takimi mbajtur në Sallën Markoni të
Radio Vatikanit, imzot Rino Fizikela, Rektor i Universitetit Papnor Lateranens dhe
ipeshkëv ndihmës i Romës, sintetizoi tiparet themelore të Magjisterit të Benediktit
XVI. Gjatë fjalimit të tij, prelati vuri theksin mbi vijat drejtuese të papnisë së
Benediktit XVI, tri vjet pas zgjedhjes. Po cilat janë këto vija, apo pika të sigurta?
Na e shpjegon vetë imzot Fizikela, në mikrofonin e Radios sonë: Përgjigje:
- Besoj se pika e parë e sigurtë është figura jashtëzakonisht e thellë dhe shprehëse
e vetë Papës Benedikti XVI, i cili me mësimin e tij, krijon një tërësi të pandarë:
mendoj se këtë e dëshmon qartë vëmendja e madhe me të cilën ndiqet çdo fjalë e çdo
fjalim i tij: sheshet janë përplot me njerëz, që e dëgjojnë me vëmemndje të heshtur
sa herë që flet e, për më tepër, e dimë se shumë prej tyre i meditojnë fjalimet e
tij e mësimet e tij. Pastaj duhet të ndalemi tek përmbajtja e tyre, që mund ta sintetizoj
në tri pika kryesore: e para më duket se është vëmendja e madhe me të cilën Papa i
ndjek ndryshimet në kulturën bashkëkohore; Ati i Shenjtë shpreh shqetësimin e tij
për identitetin e besimtarëve, të cilët nuk duhet të jenë të tillë vetëm për emër,
por duhet ta jetojnë fenë e krishterë. Pastaj shqetësohet edhe për popullsitë me pasuri
të mëdha tradite e historie. Mbi këtë bazë ngrihet edhe thirrja e vazhdueshme për
mbrojtjen e dinjitetit të njeriut e për shenjtërinë e jetës personale. Duhet të jemi
të aftë për ta vënë gjithnjë në plan të parë vëmendjen, vigjilencën për jetën: përballë
kërkesave të progresit, të shkencës, të teknikës, Papa na nxit vazhdimisht me forcë
të përpiqemi që përparimi i shkencës dhe i teknikës të mos e cenojë dinjitetin dhe
shenjtërinë e jetës së çdo njeriu. Më duket se një pikë tjetër, që theksohet me forcë
të veçantë, është tema e së vërtetës: promovimi i së vërtetës e posaçërisht nevoja
që të gjithë të jenë të vetëdijshëm se dinjiteti i njeriut mund të realizohet me atë
masë, me të cilën ai është gjithnjë në kërkim të së vërtetës. Sfida e madhe e kardinalit
të paradokohshëm Jozef Racinger përballë botës “Veluti si Deus daretur’ – që jeton
sikur Zoti të mos ekzistonte, besoj se lidhet ngushtë me temën e së vërtetës. Njeriu
nuk mund ta përjashtojë Hyjin nga horizonti i jetës së vet, sepse kështu përjashton
vetë dinjitein e tij, varfërohet, nuk e arrin kurrë atë përsosuri që e synon në mënyrë
të natyrshme secili nga ne. E, së fundi, tema e madhe e Kishës, që duhet të jetë e
aftë të shprehë në mënyrën më të mirë të mundshme besueshmërinë e Ungjillit. Më duket
se një nga pikat themelore të mendimit të Benediktit XVI është ajo e universalitetit
të misionit të Kishës, prej këndej, universaliteti lidhet ngushtë me misionaritetin.
Jemi para një impenjimi konkret, që dëshmon si mund të kapërcehen edhe çastet më të
vështira, përmes sigurisë që të ngjall shpresa. Gjithë kjo përbën intuitën e madhe
të teologjisë së Papës Jozef Racinger. Papa e përfshin fenë në dy terma, karakteristike
për të - ‘stehen’ e ‘verstehen’, që do të thonë ‘të jesh’ e të ‘kuptosh’. Feja na
bën për vete, na nxit, na kërkon të jemi të pranishëm në botë, por edhe të bëjmë përpjekje
të mëdha për të kuptuar ç’ngjet në botë e për botën.
Pyetje: - Benediktin
XVI e njohim tashmë si Bari ‘të butë e të vendosur’, që na kujton Letrën e parë
të Pjetrit”, i cili thotë: “Kumtojeni shpresën tuaj… me ëmbëlsi e respekt”…
Përgjigje:
- Natyrisht. Letra e parë e Pjetrit mendoj se është Magna Charta e teologjisë
themelore. Apostulli thotë pikërisht këtë: të jeni gati për t’iu përgjigjur çdo njeriu
që kërkon arsyen e shpresës suaj, por këtë bëjeni me ëmbëlsi, me respekt, me ndërgjegje
të pastër. Nuk duhet të harrojmë se butësia biblike ka kuptimin e vet të posaçëm.
Për Mosiun thuhet se ishte njeri i drejtë! E pra nuk është njeri i heshtur, njeri
që sprapset. Butësia është forca e guximit që buron nga kumtimi i Ungjillit.
Pyetje:
- Pas pak kohe do të kremtohet Dita Botërore e Rinisë; shtegtimi i parë apostolik
ndërkombëtar i Papës Benedikti XVI ka qenë DBR-ja e Këlnit; ndërkaq është kremtuar
edhe Agorà-ja e të Rinjve në Loreto…
Përgjigje: - Besoj se të rinjtë
dëshirojnë t’i afrohen gjithnjë më shumë Papës Benedikti XVI, dëshirojnë ta kenë vetëm
për vete. Papa i nxit të reflektojnë, i nxit ta marrin seriozisht e të mos e shpërdorojnë
rininë e tyre, i nxit edhe ta shikojnë plot shpresë të ardhmen. E unë mendoj se pikërisht
ky është mesazhi për të cilin kanë nevojë të rinjtë; të shkojnë drejt së ardhmes,
pa e harruar të tashmen e tyre, ta bazojnë jetën mbi të sotmen e, sidomos, të jenë
të aftë që mbi këtë të sotme, të ndërtojnë një ardhmëri plot kuptim. Për këtë u bën
thirrje Papa: të jenë të guximshëm në zgjedhjen e rrugëve të së ardhmes, pa harruar
se kjo zgjedhje nuk kërkon vetëm guxim, por edhe mend e entuziazëm.