Imzot Miliore në OKB: Të ndryshohet mënyra e jetesës për të shpëtuar klimën
(15.02.2008 RV)Të ndryshohen stilet
e jetës për të favorizuar zhvillimin autentik, të pranueshëm për të gjithë. Ky është
thelbi i fjalimit që mbajti Vëzhguesi i përhershëm i Selisë së Shenjtë në OKB, imzot
Çelestino Miliore në asamblenë e 62-të të përgjithshme të Kombeve të Bashkuara, e
cila diskutoi për ndryshimet e klimës. Kryeipeshkvi nënvizoi urgjencën e politikave
kombëtare dhe globale që u japin përparësi përdorimit të teknologjive ekologjike.
Çdo person duhet të ndryshojë mënyrën e vet të jetesës në të mirën e krejt planetit
dhe sistemi i tregut duhet të inkurajojë një ekonomi që e respekton ambientin, që
nuk prodhon mallra, të cilat shkaktojnë shkatërrimin e tij. I kërkuam një mendim presidentit
të komitetit shkencor të shoqatës “Greenaccord” (Marrëveshja e gjelbër), profesorit
italian Andrea Mazulo: Gjendemi para një situate paradoksale. Në vendet e industrializuara,
në të cilat niveli i konsumit është që tani jashtëzakonisht i lartë, sistemi duket
sikur nuk funksionon pa një kërkesë të vazhdueshme për rritjen e mëtejshme të konsumit.
Nxitet konsumatori të konsumojë edhe më shumë, gjithnjë e më shumë, pa pyetur se për
çfarë ka nevojë dhe për ç’arësye konsumon. Prandaj, ftesa e imzot Miliores më duket
shumë me vend, pasi kërkon marrjen e përgjegjësisë nga të dyja frontet: nga konsumatori,
që shpesh është viktimë e mesazhit të reklamave, dhe nga sistemi ekonomik që nuk mban
më parasysh funksionin e tij të vërtetë, të qenit në shërbim të njeriut.