Kosova me simbole e Kushtetutë para pavarësisë. Serbia miraton reagimet.
(12.02.2008 RV)Brenda kësaj jave,
Kuvendi i Kosovës do të bëjë të gjitha hapat që në ditën e shpalljes së pavarësisë
të jenë gati deklarata e pavarësisë, kushtetuta dhe simbolet shtetërore. Kështu u
shpreh kreu i parlamentit, Jakup Krasniqi pas takimit me shefin e Zyrës ndërkombëtare
Civile në Kosovë, Xhonas Xhonson. Krasniqi sqaroi edhe se shpallja dhe etapat e arritjes
deri tek pavarësia e plotë do të bëhen në koordinim me SHBA-të, Bashkimin Evropian
dhe bashkësinë ndërkombëtare në përgjithësi.
Serbia ka gati planin për të anulluar
shpalljen e pavarësisë së Kosovës. Masat janë diskutuar sot në Këshillin kombëtar
të Sigurimit, por mbahen sekret deri në ditën e shpalljes së pavarësisë. Gjithashtu,
më 14 shkurt do të mblidhet qeveria për të përgatitur deklaratën e anullimit të pavarësisë,
e cila do të miratohet nga parlamenti në ditën e shpalljes. Për këtë, presidenti Tadiç
dhe kryeministri Koshtunica nënshkruan mbrëmë një pakt, i cili konsolidon qëndrimin
e përbashkët ndaj Kosovës, pavarësisht se mbeten opinionet e kundërta për marrëdhëniet
me Bashkimin Evropian. Përsa i përket planeve të Beogradit, deri tani, dihet se
është parashikuar ulja e nivelit të marrëdhënieve diplomatike me të gjitha ato shtete
që do ta njohin pavarësinë e Kosovës dhe fillimi i një procesi gjyqësor në nivel ndërkombëtar
kundër tyre. Parashikohet gjithashtu bllokadë ekonomike ndaj Kosovës dhe ndalim qarkullimi
për të gjithë shqiptarët që dëshirojnë të udhëtojnë nga Kosova në Serbi.