Papa në Engjëllin e Tënzot shpjegon kuptimin e Krezhmëve: është kohë për të vendosur
ta luftojmë të keqën me Krishtin.
(11.02.2008 RV)“Të hysh në Krezhmë
do të thotë të përsëritësh premtimin personal e komunitar për t’i bërë ballë së keqes
së bashku me Krishtin”. Këtë pohoi dje Papa në lutjen e Engjëllit të Tënzot, duke
kujtuar edhe se Udha e Kryqit është e vetmja që çon në fitoren e dashurisë mbi urrejtjen,
të njeridashjes mbi egoizmin, të paqes mbi dhunën. Pasi kujtoi se të mërkurën
e kaluar, me agjërimin dhe ritin e përhimjes, hymë në Kohën e Krezhmëve, Papa bëri
një pyetje: “Ç’do të thotë të hysh në Krezhmë? E si duhet jetuar kjo kohë që i paraprin
festës së Pashkëve?”. Ati i Shenjtë u përgjigj duke treguar të vetmen rrugë, që duhet
përshkuar në luftën kundër së keqes: “Do të thotë të fillosh një kohë impenjimi
të posaçëm në luftën shpirtërore për t’iu kundërvënë së keqes, që është e pranishme
në botë, në secilin nga ne e rreth nesh. Kjo do të thotë ta shikosh të keqen në sy
e të jesh gati të luftosh kundër pasojave e, posaçërisht, kundër shkaqeve të saj,
deri në shkakun e fundit, që është shejtani”. Kuptimi i Krezhmëve – shtoi
Benedikti XVI - ka të bëjë edhe me përgjegjësinë e secilit nga ne në betejën kundër
së keqes: “Do të thotë, pra, të mos e shkarkosh problemin e së keqes mbi të
tjerët, mbi shoqërinë e mbi Hyjin, por t’i njohësh mirë përgjegjësitë tuaja e ta marrësh
mbi vete me vetëdije pjesën që të takon. Lidhur me këtë, për ne të krishterët tingëllon
më urgjente se kurrë thirrja e Krishtit për ta marrë secili ‘kryqin’ e vet e për ta
ndjekur me përvujtëri e besim”. Kryqi – pohoi më pas Papa – nuk është sinonim
me gjëmën, me fatkeqësinë, që duhet të bësh çmos ta shmangësh, por mundësi që të
ecësh në gjurmët e Krishtit e kështu të fitosh forcë në luftën kundër mëkatit: “Rruga
e kryqit është e vetmja që çon në fitoren e dashurisë mbi urrejtjen, të njeridashjes
mbi vetdashjen, të paqes mbi dhunën. Të para me këtë sy, Krezhmët janë vërtetë rast
i mirë impenjimi asketik e shpirtëror, themeluar mbi hirin e Hyjit”. Fillimi
i Krezhmëve – nënvizoi ndërmjet tjerash Ati i Shenjtë, përkon me 150-vjetorin e dukjeve
të Zojës së Bekuar në Lurdë. Katër vjet pas shpalljes të dogmës së Zojës së Papërlyer
nga ana e të Lumit Piu IX, Zoja u duk për herë të parë më 11 shkurt 1858:“Mesazhi
që Zoja vijon ta përhapë në Lurdë, na kujton fjalët e Jezusit pikërisht në fillim
të misionit të tij publik, të cilat i dëgjojmë të përsëritura këto ditë Krezhmësh.
Është ftesa për t’u kthyer në rrugën e Zotit e për t’i besuar Ungjillit, për t’u lutur
e për të bërë pendesë. Ta mirëpresim ftesën e Marisë, që i bën jehonë asaj të Krishtit,
e t’i lutemi të na nxjerrë hirin të hyjmë me fe në Krezhmë, për ta jetuar këtë kohë
me gëzim shpirtëror e impenjim bujar”.