Напярэдадні ўрачыстасці Ахвяравання Пана ў дзень святасці членаў манаскіх супольнасцяў
і таварыстваў апостальскага жыцця, кансэкраваныя асобы, якія працуюць у Мінска-Магілёўскай
архідыяцэзіі, сабраліся ў касцёле святога Яна Хрысціцеля (Мінск, Серабранкаўскі дэканат),
каб аднавіць складзеныя Богу шлюбы. Святую Імшу канцэлебравалі Мітрапаліт Мінска-Магілёўскі
арцыбіскуп Тадэвуш Кандрусевіч і дапаможны біскуп Антоні Дзям’янка. У малітве бралі
ўдзел адказны за літургічную частку святой Эўхарыстыі кс. доктар Ян Крэміс, прысутныя
святары, законныя сёстры і вернікі мінскіх парафій. Малітоўная сустрэча распачалася
адарацыяй Найсвяцейшага Сакрамэнту. Затым у працэсіі са свечкамі законнікі і законніцы
разам з Мітрапалітам і дапаможным біскупам урачыста ўвайшлі ў святыню. Арцыбіскуп
Тадэвуш Кандрусевіч у сваёй гаміліі, пасля якой адбыўся абрад аднаўлення шлюбаў, асаблівым
чынам засяродзіўся на абяцаннях, якія кансэкраваныя асобы даюць Богу падчас сваіх
шлюбаў: чысціня (цэлібат), беднасць і паслухмянасць. «Свята Маці Божай Грамнічнай
ці Ахвяравання Пана ў Ерузалемскай святыні паводле рашэння Слугі Божага Папы Яна Паўла
ІІ з’яўляецца таксама і днём малітвы аб святасці кансэкраваных асобаў. Як мы чулі
з сённяшняга Евангелля, Марыя з Юзафам ахвяруюць свайго першароднага сына Богу, —
паводле закону Майсея. Таксама члены манаскіх супольнасцяў і таварыстваў апостальскага
жыцця ахвяруюць сябе выключнаму служэнню Богу і Касцёлу праз евангельскія рады і шлюбы
беднасці, цэлібату і паслухмянасці», — сказаў Мітрапаліт. У духу ўдзячнасці за
пакліканне ўсім жыццём любіць Пана, праслаўляць Яго і служыць Яму кансэкраваныя асобы
аднавілі складзеныя Богу шлюбы і абяцанні, просячы праз заступніцтва Найсвяцейшай
Панны Марыі адвагі і вытрымкі ў адданым служэнні Пану. Паводле Catholic-By