Tadiç në ballotazh pa Koshtunicën: "Nuk do të heqim dorë nga Kosova, por jo me luftë"
(31.01.2008 RV)“Serbia nuk do të heqë dorë kurrë nga Kosova”, por do të mbrojë
të drejtat e veta pa luftë. Kështu pohoi sot, presidenti serb Boris Tadiç, gjatë një
vizite në Crnicë të Kosovës, enklava më e vogël serbe në vend. Nuk do ta pranoj kurrë
pavarësinë e Kosovës, deklaroi Tadiç, fitorja e të cilit në ballotazhin e së dielës
është tepër e dyshimtë. Në fakt, mbrëmë, partia e kryeministrit Vojisllav Koshtunica
vendosi që të mos e mbështesë atë në garën me kandidatin ultranacionalist, Tomisllav
Nikoliç. Në të vërtetë, nuk do të mbështesë as këtë të fundit, por votat e përkrahësve
të Koshtunicës konsideroheshin vendimtare për fitoren e Tadiçit. Ndërkaq, krejt
rajoni i Ballkanit përgatitet për atë që do të ndodhë në Kosovë. Vetë kryeministri
kosovar Thaçi u takua sot me përfaqësues të policisë dhe të Trupave të Mbrojtjes Civile
të Kosovës, pasi diskutoi dje me kreun e KFOR-it dhe me atë të UNMIK-ut për planin
e parandalimit të destabilizimit të vendit. Bullgaria gjithashtu, mblodhi dje Këshillin
e vet të Sigurimit, por kryeministri dhe autoritetet e tjera nuk u prononcuan mbi
qëndrimin e Sofies në rastin e shpalljes së pavarësisë. “Duhet të kemi parasysh se
Kosova është 45 km larg nga Bullgaria në linjë ajrore, se ne kemi 350 km kufi të përbashkët
me Serbinë dhe se në Serbi jetojnë shumë bashkësi bullgare”, nënvizoi kryeministri
Stanishev. Nga Helsinki, Ministria qipriote e Punëve të Jashtme ripohoi sot se asgjë
nuk mund ta ndryshojë qëndrimin e Qipros kundër pavarësisë së Kosovës.