(27.01.2008 RV)Sot Kisha katolike kremtoi të Dielën e tretë të kohës së zakonshme
gjatë vitit kishtar.U përkujtuan edhe Shenjtorët Angjela Meriçi, virgjër, themeluese
e Orsolineve e Shën Vitaliani, papë.
Nesër, e hënë, është festa e
Shën Tomës së Akuinit, meshtar domenikan, doktor i Kishës, pajtor i shkollave katolike.
Liturgjia e festës së Shenjtit na kujton se Zoti është besnik ndaj shërbëtorit të
vet. Prandaj, të mos e kuptosh veprën shëlbuese të Jezusit e të arrish deri atje,
sa ta ngatërrosh me veprën e së keqes, është shenjë e verbimit të plotë, që Jezusi
e quan blasfemi kundër Shpirtit Shenjt.
Në festën e Shën Kostancit, ipeshkëv
i Perugjës, dhe të Shenjtorëve Papia e Mauri, martirë, që do të kremtohen të martën,
liturgjia na kujton se vullneti i Zotit është burim i të gjitha të mirave.
Kumtimi i shëlbimit u përket të gjithëve, pa kurrfarë dallimi. Edhe fara, dmth Fjala
e Zotit, është e njëllojtë për të gjithë. Ndryshon vetëm mënyra e kuptimit të këtij
kumtimi nga ana e shpirtit njerëzor, që mund të jetë i gatshëm ose jo për ta pranuar
shëlbimin e për ta mbjellur farën e mirë në tokë pjellore. Ky është meditimi që na
ofron liturgjia e festës sëShën Martinës martire, të mërkurën e ardhshme.
Të enjten, në festën e Shën Gjon Boskut, meshtar, themelues i salezianëve,
atë e mësues i të rinjve dhe të Shën Marçelës romake, dishepulle e Shën Jeronimit,
liturgjia vë në qendër të vëmendjes simbolin e kandilit, dmth të dritës. Na kujton
kështu se dishepujt e Krishtit duhet të ecin nën dritën e mësimeve të Tij, në se dëshirojnë
ta dallojnë të mirën nga e keqja.
Shën Ludovika Albertoni,
vejushë romake e Shën Brixhida, abateshë në Irlandë, që do të festohen të premten,
na kujtojnë se Mbretëria e Hyjit është mahnitëse. Ajo lind në zemrën e njeriut në
mënyrë të pashpjegueshme, duke e bërë të lum, përmes lutjes, që është takim me Zotin.
Paraqitja e Krishtit në tempull (Zoja e qirave), që do të kremtohet të
shtunën – na nxit të bashkojmë zërin me zërin e Psalmistit, në thirrjen: “Eja,
o Hyj, në tempullin tënd shenjt!”. E tempulli i Hyjit nuk është më vetëm ai i popullit
të Besëlidhjes së Vjetër. Tashmë i përket mbarë njerëzimit.
E diela e ardhshme,
e kartëta e kohës së zakonshme gjatë vitit kishtar, i paraprin të Dielës së parë të
Krezhmëve, që sivjet fillojnë më shpejt se vitin e kaluar.