(23.01.2008 RV)Rezoluta e Asamblesë Parlamentare të Këshillit të Evropës për
Kosovën, që u miratua mbrëmë, vë në dukje se zona është një “fuçi baruti”, që mund
të shpërthejë nga momenti në moment dhe të rrisë më tej tensionet politike ekzistuese
në Ballkan. Shumica e 318 parlamentarëve kërkon që të gjendet sa më shpejt një
zgjidhje e negociuar, për të shmangur imponimin nga ana e Këshillit të Sigurimit të
OKB-së, që do ta kthente Kosovën në të ashtuquajturin “konflikt të ngrirë”. Por ka
nga ata, si Xhovani Di Stazi, kreu i Qendrës për zhvillimin e demokracisë lokale të
Këshillit të Evropës, i cili ka ndjekur zgjedhjet e tre muajve më parë në Kosovë,
që mendojnë se Evropa duhet të vendosë një herë e përgjithmonë dhe t’i detyrojë palët
të pranojnë një zgjidhje të vetme, pa u zgjatur më tej, në mënyrë që të kenë mundësinë
të fillojnë mbi atë bazë dialogun dhe bashkëpunimin e anasjelltë.
Kryeministri
kosovar Hashim Thaçi ndodhet sot e nesër në Bruksel për takime me përfaqësuesit
e NATO-s dhe të institucioneve evropiane. Temat në tryezën e bisedimeve janë e ardhmja
e Kosovës dhe misioni i ri i Bashkimit Evropian në vend. Po sot, ndërsa Thaçi
takohej me krerët e NATO-s, ministri i jashtëm rus, Sergei Lavrov nga Moska, paralajmëronte
fuqitë botërore se rasti i Kosovës do të krijojë precedent. “Jo pse e duam ne – theksoi
ai – por, sepse janë rreth 200 zona në botë me të njëjtat probleme”.