Benedikti XVI: Fjala para e pas lutjes së Engjëllit të Tënzot (tekst i plotë)
(20.01.2008 RV)Të dashur vëllezër e motra! Dy ditë më parë filluam Javën
e lutjes për bashkimin e të krishterëve, gjatë së cilës katolikët, ortodoksët, anglikanët
e protestantët, të vetëdijshëm se përçarjet ndërmjet tyre janë pengesë për pranimin
e Ungjillit, i luten së bashku me gjithë zemër Zotit për dhuratën e bashkimit. Kjo
nismë providenciale lindi njëqind vjet më parë, kur Atë Paul Uotson filloi “Tetëditshen”
e Lutjes për bashkimin e të gjithë dishepujve të Krishtit. Prandaj sot, në Sheshin
e Shën Pjetrit, janë të pranishëm edhe bijtë e bijat shpirtërore të Atë Uotsonit,
Vëllezërit e Motrat e Atonement të cilët i përshëndes përzemërsisht dhe i inkurajoj
të vijojnë punën vetmohuese për çështjen e bashkimit. Të gjithë e kemi për detyrë
të lutemi e të veprojmë për kapërcimin e ndarjeve ndërmjet të krishterëve, duke iu
përgjigjur dëshirës së Krishtit “Ut unum sint” – që dishepujt e tij të jenë
një gjë e vetme. Lutja, kthesa e zemrës, fuqizimi i lidhjeve të bashkimit, formojnë
thelbin e kësaj lëvizjeje shpirtërore, e cila urojmë t’u prijë së shpejti dishepujve
të Krishtit në kremtimin e përbashkët të Eukaristisë, shprehje e bashkimit të tyre
të plotë. Tema biblike e këtij vitit është plot kuptim: “Lutuni vazhdimisht”
(1 Sel. 5,17). Shën Pali i drejtohet bashkësisë së Selanikasve, që zjente nga
kundërshtimet e ndeshjet e brendshme, për t’i kërkuar me forcë të sillet ndryshe,
e sidomos, të mos harrojë themeloren: lutjen e vazhdueshme. Me këtë ftesë, ai dëshiron
të na bëjë të kuptojmë se jeta e re në Krishtin e në Shpirtin Shenjt krijon aftësinë
për ta kapërcyer egoizmin, për të jetuar së bashku në paqe e në bashkim vëllazëror
e për të mbartur secili me dëshirë, barrën e vuajtjeve të të tjerëve. Nuk duhet të
lodhemi kurrë së luturi për bashkimin e të krishterëve! Kur Jezusi, gjatë Darkës së
Mbrame, u lut që të tijtë “të jenë një gjë e vetme”, kishte ndër mend një piksynim
të caktuar: ‘që bota të besojë!” (Gjn 17, 21). Misioni ungjillëzues
i Kishës kalon nëpër rrugën ekumenike, rrugë e bashkmit në fe, e dëshmisë ungjillore
dhe e vëllazërisë së vërtetë. Ashtu si çdo vit, të premten e ardhshme, më 25 janar,
do të shkoj në Bazilikën e Shën Palit jashtë Mureve për të përfunduar, me Lutjet Mbrëmësore
Solemne, Javën e lutjes për bashkimin e të krishterëve. I ftoj romakët e shtegtarët
të bashkohen me mua e me të krishterët e kishave dhe bashkësive kishtare pjesëmarrëse
në kremtim, që t’i lutemi së bashku Zotit për dhuratën e çmuar të pajtimit ndërmjet
gjithë të pagëzuarve. Zoja e Bekuar, Nëna e Zotit, së cilës i përkujtojmë sot ditën
kur iu duk Alfonsit të Regensburgut në Kishën e Shën Andreut të Shkurreve, nxjerrtë
prej Zotit hirin e Shpirtit Shenjt për të gjithë dishepujt e Tij, që të arrijmë
në bashkimin e përkryer e të japim kështu dëshminë e fesë e të jetës, për të cilën
bota ka kaq shumë nevojë.
Pas Engjëllit të Tënzot:
Dëshiroj,
sidomos, të përshëndes të rinjtë universitarë, profesorët dhe ju të gjithë, që keni
ardhur sot kaq me shumicë në Sheshin e Shën Pjetrit për të marrë pjesë në lutjen e
Engjëllit të Tënzot e për të më shprehur solidaritetin tuaj. Ju falënderoj nga zemra,
të dashur miq; falënderoj Kardinalin Vikar që u bë nismëtar i këtij çasti takimi.
Siç e dini, e pata pranuar me kënaqësi ftesën plot mirësjellje që m’ u bë për të
folur të enjten e kaluar në përurimin e vitit akademik të Universitetit Sapienca të
Romës. E njoh mirë këtë Atené, e nderoj dhe i dua studentët që e ndjekin: çdo vit,
në raste të ndryshme, ata vijnë të më takojnë në Vatikan, së bashku me kolegët e universiteteve
të tjera. Për fat të keq, siç dihet, atmosfera që u krijua e bëri të papërshtatshme
praninë time në ceremoni. E pezullova me keqardhje, por megjithatë dërgova tekstin
që kisha përgatitur për këtë rast. Me ambientin universitar, që për shumë vjet ka
qenë bota ime, më lidh dashuria për kërkimin e së vërtetës, për ballafaqim, për dialog
të lirë, që respekton qëndrimet reciproke. Ky është edhe misioni i Kishës, në impenjimin
e saj për të ndjekur besnikërisht Krishtin, Mësuesin e jetës, të vërtetësisë e të
dashurisë. Si profesor, të themi, i dikurshëm, që ka takuar shumë studentë në jetën
e tij, ju inkurajoj të gjithëve, të dashur universitarë, të respektoni gjithnjë mendimin
e tjetrit e të kërkoni, me shpirt të lirë e përgjegjësi, të vërtetën e të mirën. Të
gjithëve e secilit nga ju i shpreh përsëri mirënjohjen, duke e siguruar për dashurinë
e lutjen time.