GJERGJ KASTRIOT SKËNDËRBEU -Në 540 vjetorin e vdekjes-
TIRANË, 15 Janar 2008/ATSH/- Gjergj Kastrioti Skënderbeu (6 maj 1405 - 17 janar
1468) sintetizon një epokë të tërë historike që mori emrin e tij: luftën kundër pushtimit
osman (fundi i shek. XIV - fundi i shek. XV). Nën udhëheqjen e tij, lufta e shqiptarëve
u ngrit në një shkallë më të lartë e më të organizuar dhe shënoi një kthesë vendimtare
në zhvillimin politik të Shqipërisë. Gjergj Kastrioti Skënderbeu ishte përfaqësuesi
më konsekuent dhe i shquar i elitës drejtuese shqiptare, që udhëhoqi më vendosmëri
frontin e luftës së shqiptarëve kundër pushtuesve osmanë. Ai realizoi të parin bashkim
të shqiptarëve, Lidhjen Shqiptare të Lezhës, e cila hapi rrugën e krijimit të shtetit
të pavarur shqiptar, themeluesi i të cilit u bë ai vetë. Kujdes të veçantë Skënderbeu
i kushtoi ruajtjes së burimeve të brendshme ekonomike, tek të cilat u mbështet lufta.
Duke fuqizuar mbrojtjen në brezin kufitar, në lindje e në jug, ai i dha mundësi banorëve
të viseve të lira, të zhvillonin një veprimtari ekonomike deri diku normale.
Krahas mbrojtjes së vendit, Skënderbeu i kushtoi vëmendje çlirimit të viseve të pushtuara
që ndikoi në formimin e mëtejshëm të lidhjeve më banorët e këtyre viseve dhe në forcimin
e bashkimin e të gjithë popullit shqiptar. Aftësitë e Skënderbeut si burrë shteti
spikatën edhe në marrëdhëniet me vendet e tjera. Duke pasur të qartë së rrezikut osman
mund t'i bëhej ballë vetëm më sukses, vetëm me forca të bashkuara, Skënderbeu kërkoi
pareshtur pjesëmarrjen e vendeve europiane në luftë kundër armikut të përbashkët.
Epopeja e Skënderbeut e shk. XV dhe vetë figura e Gjergj Kastriotit - Skënderbeut
ndikoi fuqishëm në jetën shpirtërore të shqiptarëve dhe për rritjen e vetëdijes kombëtare
të tyre. Të frymëzuar prej tyre, intelektualë të shquar shqiptarë, i pasqyruan e i
përjetuan ato në vepra historike monumentale, në të cilat nisi jetën e vet historiografia
shqiptare. Në fillim të shek të XVI (1504) Marin Barleti botoi latinisht
veprën kushtuar luftës heroike të shqiptarëve për mbrojtjen e Shkodrës, (rrethimi
i Shkodrës). Por vepra që e lartësoi figurën e tij si historian humanist është "Historia
e jetës dhe e bëmave të Skënderbeut", të cilën e botoi latinisht në Romë rreth viteve
1508-1510. Kjo vepër voluminoze njohu shumë ribotime në gjuhë e në vende të ndryshme
të Evropës. Veprat e M. Barletit u bënë burimi më i rëndësishëm ku patriotët shqiptarë
mësonin historinë e epopesë legjendare të shk. XV. Periudha e Skënderbeut
u përjetesua edhe në vepra të tjera historike nga bashkëkohësit e heroit. Një nga
bashkëpunëtorët e ngushtë të Skënderbeut, Dhimitër Frengu, shkroi latinisht, në frymën
e ideve humaniste të kohës një vepër për jetën e Skënderbeut. më disa ndryshime të
vogla ajo ndjek rrethimin e historisë së Skënderbeut të M. Barletit, që dëshmon së
kjo vepër kishte pasqyruar drejt realitetin historik, të njohur e të panjohur edhe
nga bashkëluftëtarët e afërt të Skënderbeut. Vepra e Dh. Frengut u botua pas vdekjes
së tij e përkthyer italisht, dhe njohu shumë ribotime në këtë gjuhe. Një vepër
tjetër e rëndësishme për të njohur shoqërinë shqiptare të shek. XV është "Historia
dhe gjenealogjia e shtëpisë së Muzakajve", shkruar në italisht më 1510 nga bashkëluftëtari
i Skënderbeut, Gjon Muzaka. Ajo mbeti në dorëshkrim dhe, për vlerën që ka për historinë
mesjetare shqiptare, botuesi i saj i shek. të XIX më të drejtë e ka cilësuar atë si
një "margaritar". Por vlen për tu përmëndur ne këtë plejadë autorësh që kanë
shkruar për Skëndërbeun dhe romantiku i njohur arbëresh Jeronin De Rada për hartimin
e veprës së tij "Skënderbeu i pafan"(1873), rrugën e të cilit do ta ndjek më vonë
edhe Naim Frashëri me veprën e tij "Istori e Skënderbeut"(1898) me vargjet karakteristike:
Kruj' o qytet i bekuar! prite, prite Skënderbenë po vjen si pëllumb
i shkruar të shpëtojë mëmëdhenë
Vargu i poetëve që iu kthyen
epokës së Skënderbeut nuk përfundon këtu. Ai ka vazhduar me gjeneratat në vazhdim,
duke u bërë burim i të gjithë krijuesve, e veçmas atyre që shkruajnë poezi. Për veprën
e tij madhore shkruan edhe shumë shkrimtarë të huaj në mesin e të cilëve përmendet
edhe një poemë e shkruar në gjuhën islandishte, duke e ngritur figurën dhe epokën
e tij në piedestalin e një personaliteti në historinë e njerëzimit. Skënderbeu u shndërrua
në simbol të luftës për liri e pavarësi. Ai mbeti një figurë e dashur për shqiptarët
dhe në këngët, gojëdhënat e tregimet e shumta popullore, duke i dhënë atij tiparet
e një figure legjendare.
540 VJETORI I VDEKJES SË SKËNDERBEUT:
EKSPOZITË NË GALERINË KOMBËTARE TË ARTEVE TIRANË, 16 Janar 2008/ATSH/.-
Të paktën 22 vepra në pikturë (vaj) dhe 5 portrete në skulpturë (dru, bronz), kushtuar
heroit kombëtar të shqiptarëve, Gjergj Kastriot Skënderbeut , pjesë e koleksionit
të Galerisë Kombëtare të Arteve do të prezantohen të enjten në mbrëmje,(17 janar)
në ekspozitën "Skënderbeu në Artet Pamore" që do të çelet ne Sallën e Rilindjes të
Galerisë Kombëtare të Arteve në Tiranë. Aktiviteti i organizuar nga Ministria
e Turizmit, Kulturës, Rinisë dhe Sporteve dhe Galeria Kombëtare e Arteve mbahet në
kuadër të 540 vjetorit të vdekjes së Heroit tonë Kombëtar. Ndër veprat e para që kanë
paraqitur figurën e Heroit, dhe që do të prezantohen në ekspozitën "Skënderbeu në
Artet Pamore", janë veprat e Anastas Ballamçi "Portret i Skënderbeut" (1889) dhe skulptura
në bronz e Murat Toptanit (1917), një portret i Skënderbeut që ekziston në dy kopje,
një në GKA dhe tjetra në Muzeun "Gjergj Kastriot Skënderbeu" në Krujë. Po
kështu do të prezantohen veprat e Spiro Xegës "Skënderbeu", Sali Shijakut "Artilieria
e Skënderbeut", Vilson Kilicës "Skënderbeu thyen turqit", Nestor Jonusit " Kështjella",
Guri Madhit "Turqit dorëzojnë armët", Nexhmedin Zajmit "Skënderbeu", një vepër e
Ibrahim Kodrës për Skënderbeun etj. Kurator i ekspozitës është Shefi i Sektorit të
Studimit pranë GKA, Ylli Drishti. Në fakt artistët shqiptarë, që në periudhën
e Rilindjes e kanë pasqyruar figurën e Skënderbeut në punimet e tyre. Fillimisht kjo
figurë është paraqitur në portret dhe më tej në kompozime. Ndër kompozimet e para
kanë qenë ato të Spiro Xegës, Zef Kolombit, Simon Rrotës, etj, kompozime ku ai paraqitet
në momente luftimi. Ekspozita e parë kushtuar figurës historike të Gjergj
Kastriot Skënderbeut, është hapur në Galerinë Kombëtare të Arteve në vitin 1968 me
rastin e 500 vjetorit të vdekjes së tij. Gjithashtu interesimi për këtë figurë kombëtare
është shprehur edhe në forma të tjera si konkursi i organizuar nga Galeria e Arteve
të Prishtinës me titullin "Skënderbeu Strateg dhe Diplomat", ku morën pjesë shumë
artistë nga të gjitha trevat shqiptare dhe ku fitues u shpall artisti Alush Shima
me "Portret të Skënderbeut", realizuar në 1967. Gjergj Kastrioti Skënderbeu
(6 maj 1405 - 17 janar 1468) sintetizon një epokë të tërë historike që mori emrin
e tij: luftën kundër pushtimit osman (fundi i shek. XIV - fundi i shek. XV). Nën udhëheqjen
e tij, lufta e shqiptarëve u ngrit në një shkallë më të lartë e më të organizuar dhe
shënoi një kthesë vendimtare në zhvillimin politik të Shqipërisë.