Në lutjen e Engjëllit të Tënzot Papa u bëri thirrje të rinjve emigrantë për ndërtimin
e një shoqërie më të drejtë.
(14.01.2008 RV)Lutjen e djeshme
të Engjëllit të Tënzot, kremtuar pas përfundimit të Meshës Shenjte në Solemnitetin
e Pagëzimit të Zotit, Papa ia kushtoi pikërisht dhuratës së Pagëzimit. Ati i Shenjtë
iu lut Zojës së Bekuar që të gjithë të krishterët ta jetojnë pa lëkundje e ta dëshmojnë
dashurinë e Hyjit. Më pas, Benedikti XVI kujtoi se dje kremtohej Dita e emigrantit
dhe e refugjatit, e cila vuri në qendër të vëmendjes të rinjtë, që largohen për arsye
të ndryshme nga familjet dhe nga vendet e tyre. Papa shprehu shqetësim të veçantë
për vajzat e për të miturit, që rrezikohen më shumë, duke theksuar me forcë se edhe
fëmijët e të rinjtë, që lindin e rriten në kampet e refugjatëve, kanë të drejtë ta
ndërtojnë e ta gëzojnë të ardhmen e tyre: “U shpreh vlerësimin tim të gjithë
atyre që impenjohen në favor të të rinjve emigrantë, të familjeve të tyre e të integrimit
në punë e në shkollë; i ftoj bashkësitë kishtare t’i pranojnë me simpati të rinjtë
e të miturit, së bashku me prindërit, duke u përpjekur t’i kuptojnë historitë e tyre
e t’i përkrahin në përpjekjen për t’u përfshirë në shoqërinë ku jetojnë”. Më
pas, duke u folur drejtpërdrejtë të rinjve emigrantë, Papa ia besoi të gjithë Zojës
së Bekuar, Nënës së mbarë njerëzimit: ”Impenjohuni të ndërtoni, me bashkëmoshtarët,
një shoqëri më të drejtë e më vëllazërore, duke i kryer detyrat tuaja, duke respektuar
ligjet e duke mos rënë kurrë pre e dhunës”.