Thirrje e Benediktit XVI që t’i jepet fund luftërave vëllavrasëse në Kenia.
(05.01.2008 RV)Në një letër, nënshkruar nga Kardinali Tarçizio Bertone, sekretar
i Shtetit të Vatikanit, drejtuar kryetarit të Konferencës ipeshkvnore të Kenias, kardinalit
Xhon Njue, Papa lutet për viktimat e dhunës dhe i fton keniotët të ecin në rrugën
e pajtimit. Në vijim, Ati i Shenjtë u shpreh afërsinë dhe solidaritetin ipeshkvijve
dhe gjithë banorëve të vendit afrikan, që këto ditë vijon të tronditet nga dhuna dhe
nga ndeshjet e armatosura, pas konfirmimit të presidentit Kibaki. Papa – lexohet
në letër – ndjen keqardhje të thellë për viktimat e këtyre çrregullimeve, për njerëzit
e shumtë, që humbën jetën, shpesh në mënyrë mizore, dhe familjarët që i qajnë, për
të plagosurit dhe ata që kanë humbur gjithçka kishin, ose janë detyruar të braktisin
shtëpitë e tyre si dhe për ata që kërcënohen e jetojnë me frikë në zemër.Por Benedikti
XVI nuk e humbet shpresën – vijon teksti – se ky komb i dashur, që ka njohur kohë
paqeje shoqërore e zhvillimi, duke u bërë element stabiliteti në mbarë zonën e tronditur
nga konfliktet, do të largohet sa më shpejt nga fantazma e konfliktit etnik, që ka
shkaktuar e vijon të shkaktojë akoma aq të këqija në disa pjesë të Kontinentit afrikan. Së
fundi Papa u drejtohet politikanëve, përgjegjës për të mirën e përbashkët, duke u
kërkuar të zgjedhin me vendosmëri rrugën e paqes e të drejtësisë, sepse vendi ka nevojë
pikërisht për një paqe të bazuar mbi drejtësinë e vëllazërinë, e prej këndej, duhet
t’i kapërcejë vështirësitë e sotme, duke ecur në rrugën e dialogut e të ballafaqimit
demokratik.