(04.01.2008 RV)Veriu i Shqipërisë mbetet i bllokuar nga dëbora. Rreshjet kanë
5 ditë që kanë pushuar, por temperaturat e ulta deri në minus 13 gradë, nuk lejojnë
hapjen e rrugëve. Në komunën e Iballës kanë hedhur ushqime me helikopter, por mbetet
problem shpërndarja e tyre nëpër fshatra. Arteriet kryesore që nga Shqipëria shkojnë
në Kosovë, duke përshkuar veriun, janë gati të pakalueshme. Të ftohtit i shtohet
edhe rreziku i meningjitit. Dy motra nga një fshat i Pogradecit kanë përfunduar në
karantinë në spitalin e Korçës. Rreziqet e sëmundjes janë të mëdha, pasi ajo lë pasoja
në tru, por kapja në kohë dhe kurimi me antibiotikë e mundin atë që po bëhet problem
edhe në vende më të zhvilluara si Italia, ku Ministria e Shëndetësisë ka urdhëruar
vaksinimin e popullsisë në disa zona të prekura.