Kardinali Peter Erdë, kryetar i Konferencave episkopale evropiane: 2008-ta do të jetë
vit i takimeve të mëdha ekumenike e ndërfetare.
(04.01.2008 RV)Javët e kaluara
bilançi i 2007-tës u vlerësua më se një herë nga specialistët si një nga bilançet
më të frytshme në këndvështrimin e dialogut ekumenik e ndërfetar. Me sa duket nga
impenjimet e agjendës së Këshillit të konferencave ipeshkvnore evropiane (CCEE), 2008-ta
do t’i çojë më tej sukseset e arritura. Në muajin shkurt do të organizohet në Londër,
takimi i organizmit të ipeshkvijve evropianë dhe i Këshillit të kishave evropiane
(KEK), që përfshin bashkësi të ndryshme protestante e ortodokse të Kontinentit të
vjetër. Një miting tjetër, me karakter zonal, është në program në Sofie të Bullgarisë,
ndërsa në prillin e ardhshëm, në Hungari, do të mbahet takimi tematik i të krishterëve
dhe i myslimanëve. E gjithnjë Hungaria, në fund të vitit, do të jetë teatër i një
takimi ndërkombëtar ndërmjet katolikëve e hebrenjve. Ndërkaq 2007-ta u mbyll me jehonën
e jashtëzakonshme të Letrës së dytë dërguar Papës nga 138 liderët myslimanë. Ishte
një gjest me rëndësi të madhe, siç pohon kardinali Peter Erdë, kryeipeshkëv
i Budapestit, në mikrofonin e programit hungarez të Radio Vatikanit:
Përgjigje:
- Si Letra, ashtu edhe mirëpritja e Atit të Shenjtë, sipas meje, ndikon në mënyrë
shumë pozitive mbi këtë dialog. Dialog premtues, pavarësisht nga rrethanat e vështira
që vërejmë kudo në botë, e gjithnjë inkurajues, kur teologët kërkojnë të vërtetën
e fesë së tyre, kërkojnë dialogun e sinqertë e paqësor me ata që praktikojnë një fe
tjetër, gjithashtu me bindje të sinqerta.
Pyetje: - Hirësi, ç’mendoni
lidhur me mesazhin e Papës për Ditën Botërore të Paqes 2008, që flet për familjen
njerëzore si bashkësi e paqes? Cili ju duket mësimi më i rëndësishëm?
Përgjigje:
- Sigurisht theksi i vënë mbi familjen është për ne pasuria më interesante e kësaj
letre madhështore, sepse në këtë letër familja vihet me forcë në dukje, si njësi natyrore
themelore për të gjitha shoqëritë njerëzore. Edhe për njerëzimin përdorim shpesh shprehjen
‘familja njerëzore, e jo rastësisht: familja është bashkësi, në gjirin e së cilës
mund të jetojmë, ta shikojmë drejtpërdrejtë, ndërsa mbarë njerëzimi, në një farë mënyre,
na duket diçka abstrakte. Duhet të kemi provuar jetesën në një familje të mirë, për
të pasur, pastaj, mundësinë të jetojmë si vëllezër edhe në gjirin e familjes njerëzore.