Tension i lartë në Kenia: gati 300 viktima në përleshje.
(02.01.2008 RV)Akoma e rëndë gjendja në Kenia, pas zgjedhjeve presidenciale
të 27 dhjetorit, të shoqëruara me ndeshje ndërmjet etnive, që shkaktuan vdekjen e
rreth 275 vetëve. Jo më larg se dje, në një kishë të Kiambosë u dogjën të gjallë mbi
50 vetë, të gjithë të etnisë së presidentit, i cili ka shpallur se ka fituar zgjedhjet
dhe ka akuzuar liderin e opozitës për spastrim etnik. Ndërkaq, ipeshkvijtë e vendit
bëjnë thirrje për paqe dhe pajtim dhe vënë në dukje gjendjen e keqe humanitare të
Kenias, sidomos në zonat ku banojnë të krishterët. Famullitë – denoncon zëdhënësi
i Konferencës Ipeshkvnore Keniote – janë plot me njerëz që janë strehuar aty me shpresën
se do të shpëtojnë nga raprezaljet. Por mungon ushqimi, uji, ilaçet. Gjendja është
shumë e vështirë. Ipeshkvijtë u kanë kërkuar përfaqësuesve të Bashkimit Afrikan të
ndërmjetësojnë për pajtimin mes palëve. E pikërisht sot, Bashkimi Afrikan ndërhyn,
me anë të kreut të vet, presidentit të Ganës, i cili ndodhet në Nairobi për të ulur
palët në tryezën e bisedimeve.
Pakistani shtyn zgjedhjet legjislative
të parashikuara për 8 janar. Pas gjendjes së krijuar nga vrasja e Benazir Butos,
votimet do të zhvillohen më 18 shkurt. Presidenti Musharraf është treguar gjithashtu
i gatshëm të pranojë ndihma nga jashtë në hetimet për vdekjen e kryetares së opozitës.
Lajmi u dha menjëherë pas takimit të vetë presidentit pakistanez me ministrin e jashtëm
francez, Bernard Kushner. 112 mijë euro ofrohen nga qeveria për të gjithë ata që japin
informacione të vlefshme për hetimet.
Siria vendosi ta pezullojë bashkëpunimin
me Francën, për zgjidhjen e krizës institucionale në Liban, që e ka lënë vendin pa
president, me parlamentin që shtyn vazhdimisht seancat e votimit. Të dielën e kaluar,
presidenti francez Sarkozì pati deklaruar se Parisi do të ndërpresë kontaktet me Damaskun,
derisa të mos shihen qartë provat, që tregojnë vullnetin e sirianëve për ta lënë të
lirë Libanin të zgjedhë presidentin. Siria deklaroi se është e habitur nga qëndrimi
i Sarkozìsë, pasi përpjekjet siriane për zgjidhjen e krizës libaneze njihen mirë nga
Franca, saktësoi një zëdhënës i qeverisë.
Uzbekistani ka shfuqizuar dje
dënimin me vdekje. Është konfirmimi i një ndryshimi radikal, drejt një drejtësie
pa vdekje, pas miratimit të rezolutës për pezullimin universal të dënimit me vdekje
nga ana e Kombeve të Bashkuara.
Në një situatë të vështirë, kur akoma vazhdon
dhuna në Rripin e Gazës dhe kur shpresohet të përfundojë së shpejti odiseja e rreth
2000 shtegtarëve palestinezë që patën probleme për t’u kthyer në Gazë nga Meka, për
arësye diplomatike, një iniciativë e rëndësishme merret për Lindjen e Mesme. Presidenti
amerikan Xhorxh Bush, lideri izraelit Ehud Olmert dhe kreu palestinez Abu Mazen mund
të mblidhen javën që vjen në Jeruzalem, duke shfrytëzuar rastin e vizitës së parë
të presidentit Bush në Izrael dhe në Territoret palestineze. Mbledhja duhet t’i japë
një impuls të ri procesit të paqes filluar në Konferencën e Anapolisit.