Liderët myslimanë, nënshkrues të Dokumentit: ‘Një fjalë e përbashkët’, janë gati të
takohen me Benediktin XVI: lajmin e jep princi jordanez, Ghazi bin Muhammad bin Talal
në një letër drejtuar kardinalit Bertone.
(27.12.2007 RV)Dijetarët myslimanë, nënshkrues të Letrës së hapur drejtuar
liderëve të krishterë “Një fjalë e përbashkët ndërmjet nesh e jush’ e falënderojnë
Benediktin XVI për inkurajimin dhe interesimin e tij lidhur me dialogun katoliko-mysliman.
Këtë nënvizon një nga nënshkruesit kryesorë të Dokumentit, princi jordanez Ghazi bin
Muhammad bin Talal, në një Letër drejtuar kardinalit Tarçizio Bertone. Duke marrë
zemër nga vizita e kohëve të fundit që bëri në Vatikan mbreti saudit Abd Allah bin
Abd Al-Aziz, jemi të gatshëm të takohemi me Benediktin XVI në Romë – i shkruan princi
jordanez, kardinalit Bertone, pas këshillimit me nënshkruesit kryesorë të Letrës së
138 dijetarëve myslimanë, drejtuar Papës dhe liderëve të tjerë të krishterë. Dialog
- pohohet në Letër - do të thotë shkëmbim mendimesh ndërmjet personave me këndvështrime
të ndryshme. Arsyeja që na shtyn të dialogojmë – vijon Letra - është dëshira për të
praktikuar atë që ne, myslimanët, e quajmë ‘rahmah’ e ju keni kënaqësinë ta quani
‘caritas’. Princi jordanez pohon se nuk mund të ketë marrëveshje teologjike të
plotë ndërmjet të krishterëve e myslimanëve. Megjithatë shpreh vullnetin e mirë për
bashkëpunim të bazuar mbi gjithçka që përkon ndërmjet dy palëve, për interes të së
mirës së përbashkët e për dobinë e mbarë botës”.
Gjithnjë këto ditë është botuar
një mesazh nga ana e Dijetarëve myslimanë drejtuar të krishterëve, me urime për Krishtlindjen
e Vitin e Ri.