Сьвяты Божага Нараджэньня з удзелам Папы Бэнэдыкта 16
Маем час Калядаў і самазразумела дзейнасьць Сьвяцейшага Айца ў гэты пэрыяд ёсьць вельмі
багатаю. І так у панядзелак 24-га сьнежня, а поўначы, Папа адслужыў у Базыліцы Сьвятога
Пятра Сьвятую Імшу ў чаканьні Калядаў. Была яна перадаваная тэлебачаньнем і праз
радыё на ўвесь сьвет. У сваім казаньні Папа Ратцынгэр сьцвердзіў, што Сын Давіда
прыходзіць да свайго гораду, але мусіць нарадзіцца ў пячоры, бо не было для Яго месца
ў заезным доме. Пасланы прыходзіць да сваіх, але ніхто Яго не хоча. Той, цераз Якога
быў створаны сьвет, уваходзіць у сьвет, але не ёсьць выслуханы, ані прыняты. У
бэтлеемскай пячоры- сказаў далей Бэнэдыкт 16—неба спалучаецца з зямлёю. Неба прыбыло
на зямлю. Адсюль выходзіць сьвятло на ўсе часы. Дзеля гэта там ўзьнікае радасьць,
дзеля гэтага там нараджаецца сьпеў. Сэрца Божае ў гэтую сьвятую ноч- сказаў на заканчэньне
свайго казаньня Папа- зьніжылася аж да пячоры: менавіта пакорнасьць Бога ёсьць небам.
Выходзячы ёй насуперак мы кранаем неба дык такім чынам новаю стаецца таксама зямля.
З пакорнасьцю пастушкоў рушым у дарогу, ў гэтую сьвятую ноч, да Дзіцятка Ісуса.
Зазнайма пакорнасьці Бога, Сэрца Божага. Тады Ягоная радасьць нас кране і разясьніць
сьвет- закончыў сваё казаньне Папа а поўначы 24-га сьнежня.
А ў самы дзень
Калядаў, значыць у аўторак 25-га сьнежня, Сьвяцейшы Айцец, а паўдні, з цэнтральнага
балкону Базылікі Сьвятога Пятра, зьвярнуўся да ўсіх вернікаў з Калядным Пасланьнем,
пасьля якога надзяліў сваё традыцыйнае блаславенства “Урбі эт Орбі”- Гораду Рыму і
Сьвету. У сваім пасланьні маліўся, каб Хрыстос, які прыходзіць, рассеяў цемры сьвету,
напаўняючы ўсіх радасьцю і мірам. Каб сьвятло Хрыста сталася суцяшэньнем для тых,
што знаходзяцца ў цемрах галечы, нясправядлівасьці, вайны. Для пазбаўленых стабільнасьці
ў жыцьці, пазбаўленых аховы здароў”я, асьветы, пастаяннае працы, ўдзелу ў адказнасьці
за грамадзянскія і палітычныя справы. Далей Бэнэдыкт 16 у сваім пасланьні зьвярнуў
увагу на тое, што ахвярамі ўзброенных канфліктаў, тэррарызму і насільля ёсьць людзі
найбольш безабаронныя: менавіта дзеці, жанчыны ды людзі ў пажылым веку. Адначасна этнічныя,
рэлігійныя і палітычныя напружаньні, няўпэўненасьць, спаборніцтва, супярэчнасьці,
нясправядлівасьці і дыскрымінацыі, якія кранаюць многія краіны, абвострываюць міжнародныя
адносіны- падкрэсьліў Папа. Зазначыў, што на сьвеце што-раз больш павялічваецца лік
эмігрантаў, бежанцаў, перасяленцаў, таксама з прычыны сьціхійных няшчасьцяў. Далей
ў сваім слове Папа пералічыў галоўныя запальныя пункты, ў якіх пастаянна гучыць звук
зброі: гэта ўмучаныя землі Дарфуру, Самаліі, паўночнай часткі Дэмакратычнай Рэспублікі
Конга, мяжа Эрытрэі і Эфіёпіі, увесь Блізкі Усход, асабліва Ірак, Лібан і Сьвятая
Зямля, Афганістан, Пакістан, Шры Лянка, рэгіён Балканаў ды іншыя раёны, на жаль, часта
забываныя. Хай Дзіцятка Ісус
занясе суцяшэньне тым, што знаходзяцца ў сітуацыі спробы, дасьць адказным за кіраваньне
краінамі мудрасьць і адвагу ў шуканьні развязак годных чалавека, справядлівых і трывалых.
Хай адзінкі і народы- працягваў сваё Каляднае Пасланьне Папа- не баяцца прызнаць Хрыста
і прыняць Яго. З Ім “вялікае сьвятло” асьветлівае небасхіл чалавечцтва, разам з
Ім пачынаецца “сьвяты дзень”, які не ведае захаду. Ох, каб Божае Нараджэньне было
сапраўды для ўсіх днём радасьці, надзеі і міру”- пажадаў Сьвяцейшы Айцец. Дазволім,
каб сьвятло гэтага дня распаўсюдзілася ўсюды: хай ўвойдзе да нашых сэрцаў, хай асьветліць
і агрэе нашыя дамы, хай ўнясе спакой і надзею ў нашыя гарады, хай дасьць сьвету мір—так
закончыў сваё Каляднае пасланьне Бэнэдыкт 16 Перад надзяленьнем Блаславенства “Урбі
эт Орбі” ( гораду Рыму і Сьвету) Папа накіраваў свае Калядныя прывітаньні ў 63-х
мовах сьвету, якія за пасрэдніцтвам радыё і тэлебачаньня дайшлі да кожнага кантынэнту.
Сьвяцейшы Айцец таксама прывітаў вернікаў з Беларусі, накіроўваючы да іх наступныя
прывітаньні Так, так, дарагія
слухачы, Вясёлых Калядных Сьвятаў жадае вам таксама беларуская праграма Ватыканскага
Радыё.