Më 26 dhjetor kalendari kishtar përkujton Shën Shtjefni Martir
(26.12.2007 RV)Shtjefni, i nderuar
si nga Kisha katolike, ashtu edhe ajo ortodokse, është martiri i parë i krishterimit,
i pari që dha jetën për të dëshmuar fenë në Krishtin dhe për përhapjen e Ungjillit. Rrëfimin
mbi martirizimin e tij e gjejmë në ‘Veprat e Apostujve’, ku mësojmë se ai ishte thirrur
për t’u shërbyer nxënësve të Krishtit e se u mbyt me gurë, në praninë e Palit të Tarsit
(Saulit), para se të kthehej në fe të Krishtit. Sipas një gojëdhëne, në vitin 415
një meshtar me emrin Luçian, deklaroi se kishte gjetur trupin e shenjtit pranë Jeruzalemit,
pasi i qe treguar në ëndërr vendi i varrosjes. Tradita u përhap me shpejtësi në botën
latine e greke, ashtu si edhe reliket e Shenjti të parë martir, shumë nga të cilat
nuk kishin të bënin fare me të. Gjithsesi kjo ndikoi shumë mbi përhapjen e kultit.
Historitë e ndryshme, që kanë të bëjnë me gjetjen e trupit të tij, rivarrosjen në
Kostandinopojë e më pas në Romë, tregohen me hollësi në ‘Legenda Aurea (kap. CXII). Festa
e Martirit të parë të krishterimit kremtohet më 26 dhjetor, dmth menjëherë pas Krishtlindjes. Shën
Shtjefni është Pajtor i një mori qytetesh, katedralesh e kishash nëpër botë. Vetëm
në Shkodër i kushtohen dy katedrale: katedralja e Qytetit të Veriut e katedralja historike
në Kështjellën Rozafa, ku çdo vit më 26 dhjetor, Mesha përkujtimore, në praninë e
një numri të madh besimtarësh, kremtohet mbi rrënojat e lashta. Këto rrënoja na kujtojnë
se shqiptarët luftonin nga këto ledhe kreshnike, duke shpalosur flamujt me figurën
e Shenjtit Pajtor, Shtjefnit martir, në sa edhe ata vetë ishin shumë pranë martirizimit
për mbrojtjen e Shqipërisë e të Evropës së krishterë. Shën Shtjefnit i kushtohen
një mori veprash arti, që e paraqesin duke pësuar martirizimin aq dramatik. Ndërmjet
tyre njihet botërisht një nga kryeprat e Gjotos kushtuar pikërisht Shën Shtjefinit.Ashtu
si Shën Shtjefni, martiri i parë i krishterë, mbytur me gurë në kohën e një persekutimi
të egër kundër Kishës së Jeruzalemit, besimtarët janë të thirrur të jenë dëshmitarë
të Ungjillit deri në pikën e fundit të gjakut. Ndërsa shpirti ynë është endë thellësisht
i prekur, nga "mahnitja që shkaktoi ngjarja e jashtzakonshme e Lindjes së Krishtit",
kremtuar dje, Shën Shtjefni na ndihmon të kuptojmë edhe më thellësisht misterin, të
cilin po e jetojmë në fe.